گوشۂ چشم میں اشک در نایاب لیے

گوشۂ چشم میں اشک در نایاب لیے

ساز خاموش پہ بیٹھے ہیں یہ مضراب لیے

ہے کوئی محو تخیل پئے صحن‌ گلشن

مست آنکھوں میں جوانی کے حسیں خواب لیے

ہے سبک رو تو ہر اک موج تبسم لیکن

اپنے دامن میں یہ قطرہ بھی ہے سیلاب لیے

مائل دعوت نظارا ہر اک مست خرام

سنبلیں زلف میں سو حلقہ گرداب لیے

مژدہ اے زمزمہ سنجان سرور و مستی

ساغر چشم ہے پھر آج مئے ناب لیے

مدتوں قیس کو پھرتا رہا صحرا صحرا

پا پیادہ تن تنہا دل بیتاب لیے

پھر تری بزم میں ہوتا ہے گل افشاں شادابؔ

دل میں زخموں کے شگفتہ گل شاداب لیے