na aae kaam kisi ke jo zindagi kya hai

na aa.e kaam kisī ke jo zindagī kyā hai

bashar-navāz na ho jo vo aadmī kyā hai

zamāna-sāz haiñ jo vo haiñ maslahat-andesh

jo ho ḳhulūs se aa’rī vo dostī kyā hai

pasaz vafāt na leñ jis kā naam us ke aziiz

tavañgarī hai agar ye to muflisī kyā hai

karo na dast-darāzī ḳhudā ke bandoñ par

hai naam us kā shujā.at to buzdilī kyā hai

haqīqī dostī vo hai ho jis meñ josh-o-ḳharosh

nashāt-e-rūh na ho jis meñ ḳhush-dilī kyā hai

azīz-tar haiñ mujhe ḳhud se bhī hasan chishtī

batā.ūñ aap ko kyā banda-parvarī kyā hai

na ho jo qārī-o-sāme.a pe kuchh asar-andāz

fareb-e-mahz hai 'barqī' vo shā.irī kyā hai

na aae kaam kisi ke jo zindagi kya hai

bashar-nawaz na ho jo wo aadmi kya hai

zamana-saz haiñ jo wo hain maslahat-andesh

jo ho KHulus se aa’ri wo dosti kya hai

pasaz wafat na len jis ka nam us ke aziz

tawangari hai agar ye to muflisi kya hai

karo na dast-daraazi KHuda ke bandon par

hai nam us ka shujaat to buzdili kya hai

haqiqi dosti wo hai ho jis mein josh-o-KHarosh

nashat-e-ruh na ho jis mein KHush-dili kya hai

aziz-tar haiñ mujhe KHud se bhi hasan chishti

bataun aap ko kya banda-parwari kya hai

na ho jo qari-o-samea pe kuchh asar-andaz

fareb-e-mahz hai 'barqi' wo shairi kya hai