na aaya hamein ishq karna na aaya

na aayā hameñ ishq karnā na aayā

mare umr bhar aur marnā na aayā

ye dil kī taḌap kyā lahad ko hilātī

tumheñ qabr par paañv dharnā na aayā

namak-dāñ kiye tum ne go laakh ḳhālī

namak tum ko zaḳhmoñ meñ bharnā na aayā

yahī din the sau sau tarah tum sañvarte

javānī to aa.ī sañvarnā na aayā

dabānā thā kāfir hasīnoñ kā joban

mare dāġh-e-dil ko ubharnā na aayā

tirī teġh kyā kyā nahā.ī lahū meñ

tirī tarh lekin nikharnā na aayā

sunā kar vo kahte haiñ kis bhole-pan se

hameñ va.ada kar ke mukarnā na aayā

bane pañkhuḌī naqsh-e-pā kab lahad par

tujhe ai sabā gul katarnā na aayā

'riyāz' apnī qismat ko ab kyā kahūñ meñ

bigaḌnā to aayā sañvarnā na aayā

na aaya hamein ishq karna na aaya

mare umr bhar aur marna na aaya

ye dil ki taDap kya lahad ko hilati

tumhein qabr par panw dharna na aaya

namak-dan kiye tum ne go lakh KHali

namak tum ko zaKHmon mein bharna na aaya

yahi din the sau sau tarah tum sanwarte

jawani to aai sanwarna na aaya

dabana tha kafir hasinon ka joban

mare dagh-e-dil ko ubharna na aaya

teri tegh kya kya nahai lahu mein

teri tarh lekin nikharna na aaya

suna kar wo kahte hain kis bhole-pan se

hamein wada kar ke mukarna na aaya

bane pankhuDi naqsh-e-pa kab lahad par

tujhe ai saba gul katarna na aaya

'riyaz' apni qismat ko ab kya kahun mein

bigaDna to aaya sanwarna na aaya