koi dar-parda shayad mehrban malum hota hai

koī dar-parda shāyad mehrbāñ mā'lūm hotā hai

ki ab har saañs 'umr-e-jāvedāñ mā'lūm hotā hai

vo dīvāna tumhārā rāzdāñ mā'lūm hotā hai

vahī jo be-niyāz-e-do-jahāñ mā'lūm hotā hai

samajh lete haiñ tum ko merī sūrat dekhne vaale

mirā chehra tumhārī dāstāñ mā'lūm hotā hai

haqīqat kuchh bhī ho lekin tirī ik bad-gumānī se

zamāne kā zamāna bad-gumāñ mā'lūm hotā hai

yahī tark-e-ta'alluq kī hai shāyad āḳhrī manzil

ḳhayāl-e-dost bhī dāman-kushā mā'lūm hotā hai

vo aa.eñ aur mere ghar par yaqīñ dil ko nahīñ aatā

ye ai 'naḳhshab' kamāl-e-rāz-dāñ mā'lūm hotā hai

koi dar-parda shayad mehrban ma'lum hota hai

ki ab har sans 'umr-e-jawedan ma'lum hota hai

wo diwana tumhaara raazdan ma'lum hota hai

wahi jo be-niyaz-e-do-jahan ma'lum hota hai

samajh lete hain tum ko meri surat dekhne wale

mera chehra tumhaari dastan ma'lum hota hai

haqiqat kuchh bhi ho lekin teri ek bad-gumani se

zamane ka zamana bad-guman ma'lum hota hai

yahi tark-e-ta'alluq ki hai shayad aaKHri manzil

KHayal-e-dost bhi daman-kusha ma'lum hota hai

wo aaen aur mere ghar par yaqin dil ko nahin aata

ye ai 'naKHshab' kamal-e-raaz-dan ma'lum hota hai