ہے صحرائے جنوں اک جلوہ زار حسن یکتائی

ہے صحرائے جنوں اک جلوہ زار حسن یکتائی

تماشہ ہم تماشہ گر بھی ہم ہم ہی تماشائی

الگ ہی رکھ شبِ فرقت کے سناٹے سے دل اپنا

شریک غم نہ ہو جائے کہیں ظالم یہ تنہائی

اگر آزاد رہنا ہے تو آص رائے وحشت میں

یہاں پاتی نہیں ہے دخل محکومی و دارائی

سکوں کی آس میں مرتا ہے لیکن سوچ تو اے دل

پیام موت ہے تیرے لیے سعیٔ شکیبائی

یہ مانا اشک افشانی سے ہو جاتے ہیں غیر اپنے

مگر اے دوست رسوائی بہر صورت ہے رسوائی

سوائے خار صحرا اور کوئی کر نہیں سکتا

بڑی نازک حقیقت ہے محبت کی پذیرائی

نیازؔ اس راہ میں لاکھوں مٹے ہیں کارواں لیکن

تمنا کی نہ اب تک منزل تکمیل ہاتھ آئی