hai sahra-e-junun ek jalwa-zar-e-husn-e-yaktai

hai sahrā-e-junūñ ik jalva-zār-e-husn-e-yaktā.ī

tamāsha ham tamāshā-gar bhī ham ham hī tamāshā.ī

alag hī rakh shab furqat ke sannāTe se dil apnā

sharīk-e-ġham na ho jaa.e kahīñ zālim ye tanhā.ī

agar āzād rahnā hai to aa sahrā-e-vahshat meñ

yahāñ paatī nahīñ hai daḳhl mahkūmī-o-dārā.ī

sukūñ kī aas meñ martā hai lekin soch to ai dil

payām-e-maut hai tere liye sa.ī-e-shakebā.ī

ye maanā ashk afshānī se ho jaate haiñ ġhair apne

magar ai dost rusvā.ī bahar-sūrat hai rusvā.ī

savā.e ḳhār-e-sahrā aur koī kar nahīñ saktā

baḌī nāzuk haqīqat hai mohabbat kī pazīrā.ī

'niyāz' is raah meñ lākhoñ miTe haiñ kārvāñ lekin

tamannā kī na ab tak manzil-e-takmīl haath aa.ī

hai sahra-e-junun ek jalwa-zar-e-husn-e-yaktai

tamasha hum tamasha-gar bhi hum hum hi tamashai

alag hi rakh shab furqat ke sannaTe se dil apna

sharik-e-gham na ho jae kahin zalim ye tanhai

agar aazad rahna hai to aa sahra-e-wahshat mein

yahan pati nahin hai daKHl mahkumi-o-darai

sukun ki aas mein marta hai lekin soch to ai dil

payam-e-maut hai tere liye sai-e-shakebai

ye mana ashk afshani se ho jate hain ghair apne

magar ai dost ruswai bahar-surat hai ruswai

sawae KHar-e-sahra aur koi kar nahin sakta

baDi nazuk haqiqat hai mohabbat ki pazirai

'niyaz' is rah mein lakhon miTe hain karwan lekin

tamanna ki na ab tak manzil-e-takmil hath aai