yahan sajda wahan sajda maaz-allah diwana

yahāñ sajda vahāñ sajda ma.āz-allāh dīvāna

na ka.aba dekhtā hai apne 'ālam meñ na but-ḳhāna

tū merā zikr merī yaad chhoḌ ai husn-e-farzāna

jalā de dāstāñ merī bhulā de merā afsāna

jafā-e-be-hisābāna adā-e-dil-rubāyāna

koī andāz ho lekin hijābāna हिजाबाना

tirī āñkheñ jamāl-e-yār par Thahrīñ to kyā Thahrīñ

nazar ik rishta-e-shabnam tajallī āftābāna

dayār-e-'ishq kī dushvāriyāñ al-’azmatu lillāh

safar pahlā musāfir be-zabāñ aur mulk be-gāna

ma.āz-allāh mai-ḳhāne ke aurād-e-sahar-gāhī

azaañ meñ kah gayā maiñ ek din yā pīr-e-mai-ḳhāna

'nushūr'-e-vāhidī kī bhī ġhazal kyā ḳhuub hotī hai

taḳhayyul pāk-bāzāna magar andāz rindāna

yahan sajda wahan sajda maaz-allah diwana

na kaba dekhta hai apne 'alam mein na but-KHana

tu mera zikr meri yaad chhoD ai husn-e-farzana

jala de dastan meri bhula de mera afsana

jafa-e-be-hisabana ada-e-dil-rubayana

koi andaz ho lekin hijabana हिजाबाना

teri aankhen jamal-e-yar par Thahrin to kya Thahrin

nazar ek rishta-e-shabnam tajalli aaftabana

dayar-e-'ishq ki dushwariyan al-’azmatu lillah

safar pahla musafir be-zaban aur mulk be-gana

maaz-allah mai-KHane ke aurad-e-sahar-gahi

azan mein kah gaya main ek din ya pir-e-mai-KHana

'nushur'-e-wahidi ki bhi ghazal kya KHub hoti hai

taKHayyul pak-bazana magar andaz rindana