parde uThe hue bhi hain unki idhar nazar bhi hai

parde uThe hue bhī haiñ un kī idhar nazar bhī hai

baḌh ke muqaddar aazmā sar bhī hai sañg-e-dar bhī hai

jal ga.ī shāḳh-e-āshiyāñ miT gayā terā gulsitāñ

bulbul-e-ḳhānmāñ-ḳharāb ab kahīñ terā ghar bhī hai

ab na vo shaam shaam hai apnī na vo sahar sahar

hone ko yuuñ to roz hī shaam bhī hai sahar bhī hai

chāhe jise banā.iye apnā nishāna-e-nazar

zad pe tumhāre tiir ke dil bhī hai aur jigar bhī hai

din ko usī se raushnī shab ko usī se chāñdnī

sach to ye hai ki rū-e-yār shams bhī hai qamar bhī hai

zulf-ba-dosh be-naqāb ghar se nikal khaḌe hue

ab to samajh ga.e huzūr nāloñ meñ kuchh asar bhī hai

'bedam'-e-ḳhasta kā mazār aap to chal ke dekhiye

sham.a banā hai dāġh-e-dil be-kasī-e-nauha-gar bhī hai

parde uThe hue bhi hain un ki idhar nazar bhi hai

baDh ke muqaddar aazma sar bhi hai sang-e-dar bhi hai

jal gai shaKH-e-ashiyan miT gaya tera gulsitan

bulbul-e-KHanman-KHarab ab kahin tera ghar bhi hai

ab na wo sham sham hai apni na wo sahar sahar

hone ko yun to roz hi sham bhi hai sahar bhi hai

chahe jise banaiye apna nishana-e-nazar

zad pe tumhaare tir ke dil bhi hai aur jigar bhi hai

din ko usi se raushni shab ko usi se chandni

sach to ye hai ki ru-e-yar shams bhi hai qamar bhi hai

zulf-ba-dosh be-naqab ghar se nikal khaDe hue

ab to samajh gae huzur nalon mein kuchh asar bhi hai

'bedam'-e-KHasta ka mazar aap to chal ke dekhiye

shama bana hai dagh-e-dil be-kasi-e-nauha-gar bhi hai