koi jae tur pe kis liye kahan ab wo KHush-nazari rahi

koī jaa.e tuur pe kis liye kahāñ ab vo ḳhush-nazarī rahī

na vo zauq-e-dīda-varī rahā na vo shān-e-jalva-garī rahī

jo ḳhalish ho dil ko sukūñ mile jo tapish ho soz-e-darūñ mile

vo hayāt-e-asl meñ kuchh nahīñ jo hayāt-e-ġham se barī rahī

vo ḳhizāñ kī garm-ravī baḌhī to chaman kā ruup jhulas gayā

koī ġhuncha sar na uThā sakā koī shāḳh-e-gul na harī rahī

mujhe bas tirā hī ḳhayāl thā tirā ruup merā jamāl thā

na kabhī nigāh thī huur par na kabhī nazar meñ parī rahī

tire āstāñ se judā huā to sukūn-e-dil na mujhe milā

mirī zindagī ke nasīb meñ jo rahī to dar-badarī rahī

tirā husn aañkh kā nuur hai tirā lutf vaj.h-e-surūr hai

jo tire karam kī nazar na ho to matā-e'-dil-nazarī rahī

jo tire ḳhayāl meñ gum huā to tamām vasvase miT ga.e

na junūñ kī jāma-darī rahī na ḳhirad kī dard-sarī rahī

mujhe bandagī kā mazā milā mujhe āgahī kā sila milā

tire āstāna-e-nāz par jo dharī jabīñ to dharī rahī

ye mah-o-nujūm kī raushnī tire husn kā partav badal nahīñ

tirā hijr shab kā suhāg thā mire ġham kī maañg bharī rahī

rah-e-'ishq meñ jo huā guzar dil-o-jāñ kī kuchh na rahī ḳhabar

na koī rafīq na ham-safar mire saath be-ḳhabarī rahī

tire hāsidoñ ko malāl hai ye 'nasīr' fan kā kamāl hai

tirā qaul thā jo sanad rahā tirī baat thī jo kharī rahī

koi jae tur pe kis liye kahan ab wo KHush-nazari rahi

na wo zauq-e-dida-wari raha na wo shan-e-jalwa-gari rahi

jo KHalish ho dil ko sukun mile jo tapish ho soz-e-darun mile

wo hayat-e-asl mein kuchh nahin jo hayat-e-gham se bari rahi

wo KHizan ki garm-rawi baDhi to chaman ka rup jhulas gaya

koi ghuncha sar na uTha saka koi shaKH-e-gul na hari rahi

mujhe bas tera hi KHayal tha tera rup mera jamal tha

na kabhi nigah thi hur par na kabhi nazar mein pari rahi

tere aastan se juda hua to sukun-e-dil na mujhe mila

meri zindagi ke nasib mein jo rahi to dar-badari rahi

tera husn aankh ka nur hai tera lutf wajh-e-surur hai

jo tere karam ki nazar na ho to mata-e'-dil-nazari rahi

jo tere KHayal mein gum hua to tamam waswase miT gae

na junun ki jama-dari rahi na KHirad ki dard-sari rahi

mujhe bandagi ka maza mila mujhe aagahi ka sila mila

tere aastana-e-naz par jo dhari jabin to dhari rahi

ye mah-o-nujum ki raushni tere husn ka partaw badal nahin

tera hijr shab ka suhag tha mere gham ki mang bhari rahi

rah-e-'ishq mein jo hua guzar dil-o-jaan ki kuchh na rahi KHabar

na koi rafiq na ham-safar mere sath be-KHabari rahi

tere hasidon ko malal hai ye 'nasir' fan ka kamal hai

tera qaul tha jo sanad raha teri baat thi jo khari rahi