base hain aap mere dil mein umr-bhar ke liye

base haiñ aap mire dil meñ umr-bhar ke liye

sadaf banā thā ye shāyad usī guhar ke liye

balā ḳharīdī hai maiñ ne ye umr-bhar ke liye

tumhārī zulf kā saudā hai mere sar ke liye

jo be-ġharaz na ho jis meñ na ho ḳhulūs koī

salām aise ta.alluq ko umr-bhar ke liye

shab-e-firāq kī lazzat kahāñ nasīb unheñ

duā.eñ māñgte rahte haiñ jo sahar ke liye

huā yahī ki ruke bazm-e-ġhair meñ jākar

irāda karke chale the vo mere ghar ke liye

hamāre dil ko matā-e’-hayāt kab samjhā thā

nishāna chāhiye us shoḳh ko nazar ke liye

jo dāstān-e-ġham-o-dard kā ḳhulāsa ho

mujhe vo ashk hai darkār chashm-e-tar ke liye

havas kī aañkh se ojhal hai bandagī kā maqām

ulū-e-ijz hī me.arāj hai bashar ke liye

adam ko le ke chalā huuñ 'nasīr' dāġh-e-firāq

ye zād-e-rāh bahut hai mujhe safar ke liye

base hain aap mere dil mein umr-bhar ke liye

sadaf bana tha ye shayad usi guhar ke liye

bala KHaridi hai main ne ye umr-bhar ke liye

tumhaari zulf ka sauda hai mere sar ke liye

jo be-gharaz na ho jis mein na ho KHulus koi

salam aise talluq ko umr-bhar ke liye

shab-e-firaq ki lazzat kahan nasib unhen

duaen mangte rahte hain jo sahar ke liye

hua yahi ki ruke bazm-e-ghair mein jakar

irada karke chale the wo mere ghar ke liye

hamare dil ko mata-e’-hayat kab samjha tha

nishana chahiye us shoKH ko nazar ke liye

jo dastan-e-gham-o-dard ka KHulasa ho

mujhe wo ashk hai darkar chashm-e-tar ke liye

hawas ki aankh se ojhal hai bandagi ka maqam

ulu-e-ijz hi mearaj hai bashar ke liye

adam ko le ke chala hun 'nasir' dagh-e-firaq

ye zad-e-rah bahut hai mujhe safar ke liye