qafas ki tiliyon se le ke shaKH-e-ashiyan tak hai

qafas kī tīliyoñ se le ke shāḳh-e-āshiyāñ tak hai

mirī duniyā yahāñ se hai mirī duniyā vahāñ tak hai

zamīñ se āsmāñ tak āsmāñ se lā-makāñ tak hai

ḳhudā jaane hamāre ishq kī duniyā kahāñ tak hai

ḳhudā jaane kahāñ se jalva-e-jānāñ kahāñ tak hai

vahīñ tak dekh saktā hai nazar jis kī jahāñ tak hai

koī mar kar to dekhe imtihāñ-gāh-e-mohabbat meñ

ki zer-e-ḳhanjar-e-qātil hayāt-e-jāvedāñ tak hai

niyāz-o-nāz kī rūdād-e-husn-o-ishq kā qissa

ye jo kuchh bhī hai sab un kī hamārī dāstāñ tak hai

qafas meñ bhī vahī ḳhvāb-e-pareshāñ dekhtā huuñ maiñ

ki jaise bijliyoñ kī rau falak se āshiyāñ tak hai

ḳhayāl-e-yār ne to aate hī gum kar diyā mujh ko

yahī hai ibtidā to intihā us kī kahāñ tak hai

javānī aur phir un kī javānī ai ma.āz-allāh

mirā dil kyā tah-o-bālā nizām-e-do-jahāñ tak hai

ham itnā bhī na samjhe aql khoī dil gañvā baiThe

ki husn-o-ishq kī duniyā kahāñ se hai kahāñ tak hai

vo sar aur ġhair ke dar par jhuke taubā ma.āz-allāh

ki jis sar kī rasā.ī tere sañg-e-āstāñ tak hai

ye kis kī laash be-gor-o-kafan pāmāl hotī hai

zamīñ jumbish meñ hai barham nizām-e-āsmāñ tak hai

jidhar dekho udhar bikhre haiñ tinke āshiyāne ke

mirī barbādiyoñ kā silsila yā-rab kahāñ tak hai

na merī saḳht-jānī phir na un kī teġh kā dam-ḳham

maiñ us ke imtihāñ tak huuñ vo mere imtihāñ tak hai

zamīñ se āsmāñ tak ek sannāTe kā aalam hai

nahīñ ma.alūm mere dil kī vīrānī kahāñ tak hai

sitamgar tujh se ummīd-e-karam hogī jinheñ hogī

hameñ to dekhnā ye thā ki tū zālim kahāñ tak hai

nahīñ ahl-e-zamīñ par munhasir mātam shahīdoñ kā

qabā-e-nīlgūñ pahne fazā-e-āsmāñ tak hai

sunā hai sūfiyoñ se ham ne aksar ḳhānqāhoñ meñ

ki ye rañgīñ-bayānī 'bedam'-e-rañgīñ-bayāñ tak hai

qafas ki tiliyon se le ke shaKH-e-ashiyan tak hai

meri duniya yahan se hai meri duniya wahan tak hai

zamin se aasman tak aasman se la-makan tak hai

KHuda jaane hamare ishq ki duniya kahan tak hai

KHuda jaane kahan se jalwa-e-jaanan kahan tak hai

wahin tak dekh sakta hai nazar jis ki jahan tak hai

koi mar kar to dekhe imtihan-gah-e-mohabbat mein

ki zer-e-KHanjar-e-qatil hayat-e-jawedan tak hai

niyaz-o-naz ki rudad-e-husn-o-ishq ka qissa

ye jo kuchh bhi hai sab un ki hamari dastan tak hai

qafas mein bhi wahi KHwab-e-pareshan dekhta hun main

ki jaise bijliyon ki rau falak se aashiyan tak hai

KHayal-e-yar ne to aate hi gum kar diya mujh ko

yahī hai ibtida to intiha us ki kahan tak hai

jawani aur phir un ki jawani ai maaz-allah

mera dil kya tah-o-baala nizam-e-do-jahan tak hai

hum itna bhi na samjhe aql khoi dil ganwa baiThe

ki husn-o-ishq ki duniya kahan se hai kahan tak hai

wo sar aur ghair ke dar par jhuke tauba maaz-allah

ki jis sar ki rasai tere sang-e-astan tak hai

ye kis ki lash be-gor-o-kafan pamal hoti hai

zamin jumbish mein hai barham nizam-e-asman tak hai

jidhar dekho udhar bikhre hain tinke aashiyane ke

meri barbaadiyon ka silsila ya-rab kahan tak hai

na meri saKHt-jaani phir na un ki tegh ka dam-KHam

main us ke imtihan tak hun wo mere imtihan tak hai

zamin se aasman tak ek sannaTe ka aalam hai

nahin malum mere dil ki virani kahan tak hai

sitamgar tujh se ummid-e-karam hogi jinhen hogi

hamein to dekhna ye tha ki tu zalim kahan tak hai

nahin ahl-e-zamin par munhasir matam shahidon ka

qaba-e-nilgun pahne faza-e-asman tak hai

suna hai sufiyon se hum ne aksar KHanqahon mein

ki ye rangin-bayani 'bedam'-e-rangin-bayan tak hai