dil dukhta hai kyun mera usko koi kya jaane

dil dukhtā hai kyuuñ merā us ko koī kyā jaane

is rāz-e-mohabbat ko jaane to ḳhudā jaane

sachchā hai vahī 'āshiq jo rasm-e-vafā jaane

mā'shūq vahī achchhā jo tarz-e-jafā jaane

ai dil koī kyā jaane kyā hai maraz-e-ulfat

is dard ko vo jaane jo is kī davā jaane

miltā hai ḳhudā us ko jo shirk se baaz aa.e

har but ko tah-e-dil se bas shān-e-ḳhudā jaane

har chhoTe baḌe kā hai rutba usī parde meñ

chhoTe ko bhī rutbe meñ apne se baḌā jaane

mālik hai jo is ghar kā pahchāne vahī ghar ko

ai 'qais' mire dil ko kaun is ke sivā jaane

dil dukhta hai kyun mera us ko koi kya jaane

is raaz-e-mohabbat ko jaane to KHuda jaane

sachcha hai wahi 'ashiq jo rasm-e-wafa jaane

ma'shuq wahi achchha jo tarz-e-jafa jaane

ai dil koi kya jaane kya hai maraz-e-ulfat

is dard ko wo jaane jo is ki dawa jaane

milta hai KHuda us ko jo shirk se baz aae

har but ko tah-e-dil se bas shan-e-KHuda jaane

har chhoTe baDe ka hai rutba usi parde mein

chhoTe ko bhi rutbe mein apne se baDa jaane

malik hai jo is ghar ka pahchane wahi ghar ko

ai 'qais' mere dil ko kaun is ke siwa jaane