lahad mein sone do yaro ki chain aaya hai mushkil se

lahad meñ sone do yaaro ki chain aayā hai mushkil se

baḌā lambā safar thā aa rahā huuñ duur manzil se

kiyā hai zab.h jis ko us ko apnā muñh to dikhlā do

kahīñ parda kiyā karte haiñ qātil apne bismil se

hamārī dars-gāh-e-'ishq hai sahn-e-chaman goyā

guloñ kā 'ishq sīkhā hai yahīñ ham ne 'anādil se

mohabbat jurm hai mashrab meñ tere tauba kar vā'iz

hameñ to baat bhī karnā gunah hai aise jāhil se

misal mash.hūr hai nisf-ul-mulāqāt us ko kahte haiñ

mohabbat kā hai qaa.im silsila rusul-o-rasā.il se

garebāñ kī taraf baḌhtā hai merā haath kyā bā'is

magar fasl-e-bahār aa.ī koī pūchhe 'anādil se

faqat dīdār kā saa.il huuñ kyuuñ mujh ko jhaḌakte ho

karam-pesha ḳhafā hote nahīñ āvāz-e-sā.il se

koī 'āshiq vahāñ dam toḌtā hai hichkiyāñ le kar

sadā kuchh dhīmī-dhīmī aa rahī hai kū-e-qātil se

lab-e-zaḳhm-e-jigar hilte haiñ kuchh āhista-āhista

paḌe haiñ vaar ochhe hai shikāyat dast-e-qātil se

nigah us ke shahīd-e-nāz kī maqtal meñ phirtī hai

ki āñkheñ chaar ho jaa.eñ dam-e-ākHir to qātil se

huī ThanDī na marne par bhī yā-rab ātish-e-furqat

mujhe jannat meñ bhī dozaḳh hai apnī sozish-e-dil se

bagūle kī tarah kyuuñ 'qais' pīchhe dauḌ jaatā hai

ḳhudā jaane pukār uThtā hai us ko kaun mahmil se

lahad mein sone do yaro ki chain aaya hai mushkil se

baDa lamba safar tha aa raha hun dur manzil se

kiya hai zabh jis ko us ko apna munh to dikhla do

kahin parda kiya karte hain qatil apne bismil se

hamari dars-gah-e-'ishq hai sahn-e-chaman goya

gulon ka 'ishq sikha hai yahin hum ne 'anadil se

mohabbat jurm hai mashrab mein tere tauba kar wa'iz

hamein to baat bhi karna gunah hai aise jahil se

misal mashhur hai nisf-ul-mulaqat us ko kahte hain

mohabbat ka hai qaim silsila rusul-o-rasail se

gareban ki taraf baDhta hai mera hath kya ba'is

magar fasl-e-bahaar aai koi puchhe 'anadil se

faqat didar ka sail hun kyun mujh ko jhaDakte ho

karam-pesha KHafa hote nahin aawaz-e-sail se

koi 'ashiq wahan dam toDta hai hichkiyan le kar

sada kuchh dhimi-dhimi aa rahi hai ku-e-qatil se

lab-e-zaKHm-e-jigar hilte hain kuchh aahista-ahista

paDe hain war ochhe hai shikayat dast-e-qatil se

nigah us ke shahid-e-naz ki maqtal mein phirti hai

ki aankhen chaar ho jaen dam-e-akHir to qatil se

hui ThanDi na marne par bhi ya-rab aatish-e-furqat

mujhe jannat mein bhi dozaKH hai apni sozish-e-dil se

bagule ki tarah kyun 'qais' pichhe dauD jata hai

KHuda jaane pukar uThta hai us ko kaun mahmil se