shab-e-furqat ki bedari jo aage thi so ab bhi hai

shab-e-furqat kī bedārī jo aage thī so ab bhī hai

ye shab 'ushshāq par bhārī jo aage thī so ab bhī hai

hasīnoñ kī jafā kaarī jo aage thī so ab bhī hai

hameñ jiine se be-zārī jo aage thī so ab bhī hai

jafā-e-charḳh-e-zañgārī jo aage thī so ab bhī hai

vahī rasm-e-sitam jaarī jo aage thī so ab bhī hai

kareñ vo be-vafā.ī jitnī chāheñ sañg-dil ho kar

hamārī to vafā-dārī jo aage thī so ab bhī hai

zamāne kī bhī gardish kā nahīñ paḌtā asar un par

tirī āñkhoñ kī ḳhūñ-ḳhvārī jo aage thī sau ab bhī hai

banāyā hai hameñ mai-nosh zāhid agle logoñ ne

ye rasm-e-ḳhushnumā jaarī jo aage thī so ab bhī hai

tumhārī vo nazar ham pe nahīñ jo is se pahle thī

hamārī nāz-bardārī jo aage thī so ab bhī hai

vahī naale haiñ furqat meñ kisī barq-e-tajallī ke

in aahoñ kī sharar-bārī jo aage thī so ab bhī hai

mujhe ai case is lailā se ab tak rasm ulfat hai

vahī merī giraftārī jo aage thī so ab bhī hai

shab-e-furqat ki bedari jo aage thi so ab bhi hai

ye shab 'ushshaq par bhaari jo aage thi so ab bhi hai

hasinon ki jafa kari jo aage thi so ab bhi hai

hamein jine se be-zari jo aage thi so ab bhi hai

jafa-e-charKH-e-zangari jo aage thi so ab bhi hai

wahi rasm-e-sitam jari jo aage thi so ab bhi hai

karen wo be-wafai jitni chahen sang-dil ho kar

hamari to wafa-dari jo aage thi so ab bhi hai

zamane ki bhi gardish ka nahin paDta asar un par

teri aankhon ki KHun-KHwari jo aage thi sau ab bhi hai

banaya hai hamein mai-nosh zahid agle logon ne

ye rasm-e-KHushnuma jari jo aage thi so ab bhi hai

tumhaari wo nazar hum pe nahin jo is se pahle thi

hamari naz-bardari jo aage thi so ab bhi hai

wahi nale hain furqat mein kisi barq-e-tajalli ke

in aahon ki sharar-bari jo aage thi so ab bhi hai

mujhe ai case is laila se ab tak rasm ulfat hai

wahi meri giraftari jo aage thi so ab bhi hai