maine rasta dekha aap ka zamane tak

maiñ ne rāsta dekhā aap kā zamāne tak

aap hī nahīñ aa.e merī jaan jaane tak

zauq-e-bandagī merā tere āstāne tak

terā āstāna hai mere sar jhukāne tak

aap hī nahīñ to phir rūThne se kyā hāsil

lutf rūThne kā hai aap ke manāne tak

un kī be-niyāzī par phir shabāb aayā hai

dil kī baat jā.egī dard ke fasāne tak

chāra-gar na chheḌ aa kar zaḳhm-e-dil ko sone de

ye ġharīb so.eñge un ke muskurāne tak

jā ke ḳhud bulā lā.ūñ apne āshiyāne meñ

barq chal ke aa.egī mere āshiyāne tak

kuchh nahīñ rahā baaqī un kī jalva-gāhoñ meñ

hai ye sab ġhurūr un kā ā.īna dikhāne tak

ġham kī intihā 'qaisar' ibtidā hai ḳhushiyoñ kī

ġham kā bojh bhārī hai sirf ġham uThāne tak

main ne rasta dekha aap ka zamane tak

aap hi nahin aae meri jaan jaane tak

zauq-e-bandagi mera tere aastane tak

tera aastana hai mere sar jhukane tak

aap hi nahin to phir ruThne se kya hasil

lutf ruThne ka hai aap ke manane tak

un ki be-niyazi par phir shabab aaya hai

dil ki baat jaegi dard ke fasane tak

chaara-gar na chheD aa kar zaKHm-e-dil ko sone de

ye gharib soenge un ke muskurane tak

ja ke KHud bula laun apne aashiyane mein

barq chal ke aaegi mere aashiyane tak

kuchh nahin raha baqi un ki jalwa-gahon mein

hai ye sab ghurur un ka aaina dikhane tak

gham ki intiha 'qaisar' ibtida hai KHushiyon ki

gham ka bojh bhaari hai sirf gham uThane tak