مدت سے ہمیں دیر و حرم ڈھونڈ رہے ہیں

مدت سے ہمیں دیر و حرم ڈھونڈ رہے ہیں

ہم ہیں کہ ترا نقشِ قدم ڈھونڈ رہے ہیں

کچھ رنگ پئے دیدۂ نم ڈھونڈ رہے ہیں

غم ڈھونڈ چکے رونقِ غم ڈھونڈ رہے ہیں

اے دامنِ رنگیں مرے اشکوں کو چھپالے!

کب سے تجھے مایوسِ کرم ڈھونڈ رہے ہیں

پھولوں کے نگر میں، کبھی کانٹوں کے نگر میں

ہم تجھ کو ترے سر کی قسم ڈھونڈ رہے ہیں

کیا بات ہے، دیوانے سرِ دار و رسن بھی

اے دوست! تری زلف کے خم ڈھونڈ رہے ہیں

میخانے میں ہم بیٹھے ہیں ہر غم کو بھلا کر

میخانے کے باہر ہمیں غم ڈھونڈ رہے ہیں

اس گوشۂ تنہائی سے اب نکلو خدا را

قیصرؔ تمہیں کچھ اہلِ قلم ڈھونڈ رہے ہیں