na dur us se kahin tu ai dil-e-ranjur ho jaana

na duur us se kahīñ tū ai dil-e-ranjūr ho jaanā

ki un se duur honā hai ḳhudā se duur ho jaanā

huā un ko gavārā dil hī meñ mastūr ho jaanā

mubārak dil ke dāġhoñ ko charāġh-e-tūr ho jaanā

tire jalvoñ ko vaqt-e-sub.h maiñ ne kHuub dekhā hai

nikhar kar ḳhuld ban jaanā sañvar kar huur ho jaanā

ye merī sa'ī-e-istiqlāl hī kā ek karishma hai

mohabbat meñ vafā kā dā.imī dastūr ho jaanā

banā kar raaz apnā bhej denā mujh ko duniyā meñ

ḳhud un kā parda-e-asrār meñ mastūr ho jaanā

pata detā hai ai fitrat tirī ḳhud iḳhtiyārī kā

ba-qaid-e-iḳhtiyār insān kā majbūr ho jaanā

jo vo mahfil meñ aa pahuñche to uThnā hī nahīñ mumkin

vo pahle se chalā jaaye jise manzūr ho jaanā

mere dāġh-e-jigar se pūchhiye yā dil ke zaḳhmoñ se

nigāh-e-multafit kā marham-e-kāfūr ho jaanā

dhundalke meñ idhar uThnā hijāb-e-rāz-e-mutlaq kā

udhar dil kā tajalliyāt se mā'mūr ho jaanā

idhar un kā nikalnā parda-e-asrār se bāhar

udhar zulmāt-e-hastī kā sarāpā nuur ho jaanā

anā ko zabt karnā fil-haqīqat saḳht mushkil hai

anal-haq kah ke kuchh mushkil nahīñ mansūr ho jaanā

niyāz 'ishq us ke baa'd maraz-e-mustaqil Thahrā

gavārā kohkan ko kyuuñ huā mazdūr ho jaanā

haqīqat meñ thā ik saḳht inqilāb-e-vaqt ai 'qātil'

judā ajmer se aur lucknow se duur ho jaanā

na dur us se kahin tu ai dil-e-ranjur ho jaana

ki un se dur hona hai KHuda se dur ho jaana

hua un ko gawara dil hi mein mastur ho jaana

mubarak dil ke daghon ko charagh-e-tur ho jaana

tere jalwon ko waqt-e-subh main ne kHub dekha hai

nikhar kar KHuld ban jaana sanwar kar hur ho jaana

ye meri sa'i-e-istiqlal hi ka ek karishma hai

mohabbat mein wafa ka daimi dastur ho jaana

bana kar raaz apna bhej dena mujh ko duniya mein

KHud un ka parda-e-asrar mein mastur ho jaana

pata deta hai ai fitrat teri KHud iKHtiyari ka

ba-qaid-e-iKHtiyar insan ka majbur ho jaana

jo wo mahfil mein aa pahunche to uThna hi nahin mumkin

wo pahle se chala jaye jise manzur ho jaana

mere dagh-e-jigar se pūchhiye ya dil ke zaKHmon se

nigah-e-multafit ka marham-e-kafur ho jaana

dhundalke mein idhar uThna hijab-e-raaz-e-mutlaq ka

udhar dil ka tajalliyat se ma'mur ho jaana

idhar un ka nikalna parda-e-asrar se bahar

udhar zulmat-e-hasti ka sarapa nur ho jaana

ana ko zabt karna fil-haqiqat saKHt mushkil hai

anal-haq kah ke kuchh mushkil nahin mansur ho jaana

niyaz 'ishq us ke ba'd maraz-e-mustaqil Thahra

gawara kohkan ko kyun hua mazdur ho jaana

haqiqat mein tha ek saKHt inqilab-e-waqt ai 'qatil'

juda ajmer se aur lucknow se dur ho jaana