ai kash ki soz-e-gham ashkon mein Dhal jae

ai kaash ki soz-e-ġham ashkoñ meñ Dhal jaa.e

dāman se agar poñchhūñ dāman mirā jal jaa.e

ham ko to gulistāñ ke har gul se mohabbat hai

gulchīñ ko jo ho nafrat gulshan se nikal jaa.e

is vāste gulshan meñ kāñToñ kī zarūrat hai

sayyād na be-khaTke kaliyoñ ko masal jaa.e

ham ne to 'rashīd' itnā mafhūm-e-ġhazal samjhā

bas zindagī shā'ir kī ash'ār meñ Dhal jaa.e

ai kash ki soz-e-gham ashkon mein Dhal jae

daman se agar ponchhun daman mera jal jae

hum ko to gulistan ke har gul se mohabbat hai

gulchin ko jo ho nafrat gulshan se nikal jae

is waste gulshan mein kanTon ki zarurat hai

sayyaad na be-khaTke kaliyon ko masal jae

hum ne to 'rashid' itna mafhum-e-ghazal samjha

bas zindagi sha'ir ki ash'ar mein Dhal jae