رستے میں تم آجاؤ پہلے کی طرح پھر سے

رستے میں تم آجاؤ پہلے کی طرح پھر سے

منہ میرا نہ کھلواؤ پہلے کی طرح پھر سے

میرا نہ سہی لیکن دنیا کا بھرم رکھ لو

محفل میں چلے آؤ پہلے کی طرح پھر سے

ہر رنگ تمہارا ہے ہر روپ میں جچتے ہو

تم کچھ بھی پہن آؤ پہلے کی طر ح پھر سے

یہ بزمِ عقیدت ہے الزام نہیں واجب

جانا ہے چلے جاؤ پہلے کی طرح پھر سے

یہ دنیا تمہیں حاکم تسلیم ابھی کر لے

بس ہوش میں آ جاؤ پہلے کی طرح پھر سے

بے وجہ کی فیاضی رستے پہ نہ لے آئے

منگتوں میں چلے آؤ پہلے کی طرح پھر سے

غیروں سے حکیمیؔ یہ کیوں مانگے تمہارا ہے

دے دو یا کہ دلواؤ پہلے کی طرح پھر سے