saya koi main apne hi paikar se nikalun

saayā koī maiñ apne hī paikar se nikālūñ

tanhā.ī batā kaise tujhe ghar se nikālūñ

ik mauj bhī mil jaa.e agar mujh ko sile meñ

girte hue dariyā ko samundar se nikālūñ

teshe se bajātā phirūñ maiñ barbat-e-kohsār

naġhme jo mire dil meñ haiñ patthar se nikālūñ

lau tez nahīñ kuchh mirī āñkhoñ hī kī shāyad

matlab yahī be-nūrī-e-manzar se nikālūñ

badle na koī rañg tirā husn-e-ḳhamoshī

maiñ baat ke pahlū tire tevar se nikālūñ

tauba ne jagāyā mire andar kā sharābī

ab faal bhī TuuTe hue sāġhar se nikālūñ

sochoñ ke bayābāñ meñ liye phirtā hai mujh ko

kyā zehn bhī saudā hai jise sar se nikālūñ

ik nasl-e-suḳhan mujh meñ hai ābād 'muzaffar'

sūrat na.ī har lafz ke andar se nikālūñ

saya koi main apne hi paikar se nikalun

tanhai bata kaise tujhe ghar se nikalun

ek mauj bhi mil jae agar mujh ko sile mein

girte hue dariya ko samundar se nikalun

teshe se bajata phirun main barbat-e-kohsar

naghme jo mere dil mein hain patthar se nikalun

lau tez nahin kuchh meri aankhon hi ki shayad

matlab yahi be-nuri-e-manzar se nikalun

badle na koi rang tera husn-e-KHamoshi

main baat ke pahlu tere tewar se nikalun

tauba ne jagaya mere andar ka sharabi

ab fal bhi TuTe hue saghar se nikalun

sochon ke bayaban mein liye phirta hai mujh ko

kya zehn bhi sauda hai jise sar se nikalun

ek nasl-e-suKHan mujh mein hai aabaad 'muzaffar'

surat nai har lafz ke andar se nikalun