jo mahfil se unki nikale hue hain

jo mahfil se un kī nikāle hue haiñ

ġham-e-do-jahāñ ke havāle hue haiñ

zarā tere gesū jo bikhre haiñ ruḳh par

añdhere hue haiñ ujāle hue haiñ

tire vasl kī aarzū tauba-tauba

ye armān dil se nikāle hue haiñ

ye kaun aa rahā hai ki sab ahl-e-mahfil

matā’-e-dil-o-jāñ sambhāle hue haiñ

fasāna hai dil jin kī be-mehriyoñ kā

vahī dard-e-dil sunñe vaale hue haiñ

baḌā saaf thā rāsta zindagī kā

tirī zulf ne pech Daale hue haiñ

yahāñ 'saif' har din qayāmat kā din hai

vo kis hashr par baat Taale hue haiñ

jo mahfil se un ki nikale hue hain

gham-e-do-jahan ke hawale hue hain

zara tere gesu jo bikhre hain ruKH par

andhere hue hain ujale hue hain

tere wasl ki aarzu tauba-tauba

ye arman dil se nikale hue hain

ye kaun aa raha hai ki sab ahl-e-mahfil

mata’-e-dil-o-jaan sambhaale hue hain

fasana hai dil jin ki be-mehriyon ka

wahi dard-e-dil sunne wale hue hain

baDa saf tha rasta zindagi ka

teri zulf ne pech Dale hue hain

yahan 'saif' har din qayamat ka din hai

wo kis hashr par baat Tale hue hain