tilism-e-lab mein kya kuchh hai wo chashm-e-mehrban kya hai

tilism-e-lab meñ kyā kuchh hai vo chashm-e-mehrbāñ kyā hai

abhī se kyā kaheñ zar-e-kHāna-e-dil meñ kahāñ kyā hai

tumhārī kahkashā.eñ kaun sī duniyā kā partav haiñ

yañh to chāñd hai bādal hai taare haiñ vahāñ kyā hai

vahāñ bhī kyā sitāre un ke pahlū meñ turshte haiñ

vahāñ sāz-e-zamāñ kyā hai ram-e-siyārgāñ kyā hai

abhī vo mai-kada bar-dosh āñkheñ rū-ba-rū hoñgī

abhī vo hañs ke pūchheñge ki rañg-e-mai-kashāñ kyā hai

ye kaisī raushnī miTTī tale karvaT badaltī hai

vo ā.īna to ḳhākī thā ye ’aks-e-jāvedāñ kyā hai

vahāñ bhī kyā koī hijr-e-abad ābād bastā hai

yahāñ to pochhiye mat sūrat-e-dard-e-nihāñ kyā hai

ye sail-e-hijr tham jaa.e zarā to phir khule shāyad

ki ye rañg-e-judā.ī az-karāñ tā-ba-karāñ kyā hai

kisī dariyā kī bāñhoñ ke bulāve ā.gaye varna

hamāre vāste ye vus.at-e-reg-e-ravāñ kyā hai

tilism-e-lab mein kya kuchh hai wo chashm-e-mehrban kya hai

abhi se kya kahen zar-e-kHana-e-dil mein kahan kya hai

tumhaari kahkashaen kaun si duniya ka partaw hain

yanh to chand hai baadal hai tare hain wahan kya hai

wahan bhi kya sitare un ke pahlu mein turshte hain

wahan saz-e-zaman kya hai ram-e-siyargan kya hai

abhi wo mai-kada bar-dosh aankhen ru-ba-ru hongi

abhi wo hans ke puchhenge ki rang-e-mai-kashan kya hai

ye kaisi raushni miTTi tale karwaT badalti hai

wo aaina to KHaki tha ye ’aks-e-jawedan kya hai

wahan bhi kya koi hijr-e-abad aabaad basta hai

yahan to pochhiye mat surat-e-dard-e-nihan kya hai

ye sail-e-hijr tham jae zara to phir khule shayad

ki ye rang-e-judai az-karan ta-ba-karan kya hai

kisi dariya ki banhon ke bulawe aagaye warna

hamare waste ye wusat-e-reg-e-rawan kya hai