aashiq dua kare to yahi ek dua kare

āshiq duā kare to yahī ik duā kare

do dil mileñ to phir na judā hoñ ḳhudā kare

merī tarah tujhe bhī ḳhudā mubtalā kare

merī nigāh terī nazar ho ḳhudā kare

dil ho butoñ ke ishq se ḳhālī ḳhudā kare

vo be-niyāz ab use be-mudda.ā kare

dil jis ko chāhtā ho usī kā gilā kare

ye ishq hai to ham ko na aa.e ḳhudā kare

vo do diloñ ko ek kare yā judā kare

sab us ke haath meñ hai jo chāhe ḳhudā kare

in be-vafā butoñ se tabī.at uchaT ga.ī

ab to ḳhudā se apnī lage lau ḳhudā kare

ham bhī vafā kareñge hai jab tak ki dam meñ dam

vo bhī jafā se baaz na aa.e ḳhudā kare

tū merī shakl meñ ho to maiñ terī shakl meñ

yuuñ merā terā vasl ho ai but ḳhudā kare

āñḳheñ milī hoñ rone hī ke vāste jise

vo apne haal par jo na ro.e to kyā kare

detī nahīñ javāb ye patthar kī mūrateñ

kyā be-zabāñ butoñ se koī iltijā kare

kahte haiñ dekh kar mujhe 'akbar' butān-e-hind

gumrāh hai ye raah par aa.e ḳhudā kare

aashiq dua kare to yahi ek dua kare

do dil milen to phir na juda hon KHuda kare

meri tarah tujhe bhi KHuda mubtala kare

meri nigah teri nazar ho KHuda kare

dil ho buton ke ishq se KHali KHuda kare

wo be-niyaz ab use be-muddaa kare

dil jis ko chahta ho usi ka gila kare

ye ishq hai to hum ko na aae KHuda kare

wo do dilon ko ek kare ya juda kare

sab us ke hath mein hai jo chahe KHuda kare

in be-wafa buton se tabiat uchaT gai

ab to KHuda se apni lage lau KHuda kare

hum bhi wafa karenge hai jab tak ki dam mein dam

wo bhi jafa se baz na aae KHuda kare

tu meri shakl mein ho to main teri shakl mein

yun mera tera wasl ho ai but KHuda kare

aanKHen mili hon rone hi ke waste jise

wo apne haal par jo na roe to kya kare

deti nahin jawab ye patthar ki muraten

kya be-zaban buton se koi iltija kare

kahte hain dekh kar mujhe 'akbar' butan-e-hind

gumrah hai ye rah par aae KHuda kare