jalwe to nazar mein sama jaen jalwon mein samana mushkil hai

jalve to nazar meñ samā jaa.eñ jalvoñ meñ samānā mushkil hai

tūfān-e-tajallī meñ kho kar phir aap ko paanā mushkil hai

tafsīr baqā kā ye mazmūñ hai rāz-e-kitāb-e-kun-fa-yakūñ

hastī kā safha-e-hastī se har naqsh miTānā mushkil hai

vo jis ke hasīn tabassum se ġhunchoñ meñ tabassum paidā ho

us barq-e-nazar kā gulshan par kyā barq girānā mushkil hai

vo tuur kā jalva thā jis se behosh hue phir hosh aayā

ab sāmnā hai mast āñkhoñ kā ab hosh meñ aanā mushkil hai

sab duniyā ke murdoñ ko zinda kar deñge masīhā mumkin hai

jo terī nazar kā maarā hai haañ us ko jalānā mushkil hai

hai hashr-ḳhirāmī kā sadqa hañgāma-e-mahshar garm huā

hāthoñ se sitam ke māroñ ke dāman kā chhuḌānā mushkil hai

sar denā har ik kā kaam nahīñ ye zauq-e-shahādat 'aam nahīñ

shamshīr ke aage ai 'qātil' gardan kā jhukānā mushkil hai

jalwe to nazar mein sama jaen jalwon mein samana mushkil hai

tufan-e-tajalli mein kho kar phir aap ko pana mushkil hai

tafsir baqa ka ye mazmun hai raaz-e-kitab-e-kun-fa-yakun

hasti ka safha-e-hasti se har naqsh miTana mushkil hai

wo jis ke hasin tabassum se ghunchon mein tabassum paida ho

us barq-e-nazar ka gulshan par kya barq girana mushkil hai

wo tur ka jalwa tha jis se behosh hue phir hosh aaya

ab samna hai mast aankhon ka ab hosh mein aana mushkil hai

sab duniya ke murdon ko zinda kar denge masiha mumkin hai

jo teri nazar ka mara hai han us ko jalana mushkil hai

hai hashr-KHirami ka sadqa hangama-e-mahshar garm hua

hathon se sitam ke maron ke daman ka chhuDana mushkil hai

sar dena har ek ka kaam nahin ye zauq-e-shahadat 'am nahin

shamshir ke aage ai 'qatil' gardan ka jhukana mushkil hai