jine ki aarzu hai to mastana ban ke ji

jiine kī aarzū hai to mastāna ban ke jī

yā'nī ġhulām-e-murshid-e-mai-kHāna ban ke jī

haañ haañ usī ko kahte haiñ me’arāj-e-zindagī

sham' bhī kah rahī hai ki parvāna ban ke jī

kuchh anjuman ko vajd ho kuchh haal kuchh malāl

teġh-e-nigāh-e-nāz kā nazrāna ban ke jī

yakjā na kar qayām ki kab hai qayām-gāh

is daur meñ tū sāġhar-o-paimāna ban ke jī

us pā-e-kā’ba rañg pe sajde hoñ baar baar

hushyāriyāñ yahī haiñ ki dīvāna ban ke jī

ai 'rāz' shakl-e-‘rāz’ ko lillāh chhoḌ de

sab ke laboñ pe 'aam ho afsānā ban ke jī

jine ki aarzu hai to mastana ban ke ji

ya'ni ghulam-e-murshid-e-mai-kHana ban ke ji

han han usi ko kahte hain me’araj-e-zindagi

sham' bhi kah rahi hai ki parwana ban ke ji

kuchh anjuman ko wajd ho kuchh haal kuchh malal

tegh-e-nigah-e-naz ka nazrana ban ke ji

yakja na kar qayam ki kab hai qayam-gah

is daur mein tu saghar-o-paimana ban ke ji

us pa-e-ka’ba rang pe sajde hon bar bar

hushyariyan yahi hain ki diwana ban ke ji

ai 'raaz' shakl-e-‘raaz’ ko lillah chhoD de

sab ke labon pe 'am ho afsana ban ke ji