but-kade mein dekh didar-e-butan

but-kade meñ dekh dīdār-e-butāñ

ho rahā hai dil giraftār-e-butāñ

zāhidā de chhoḌ masjid kā ḳhayāl

vasl chahtā hai to ho yār-e-butāñ

zulf-e-kāf-e-kufr kā rakh silsila

baañd gul meñ apne zunnār-e-butāñ

ho ḳharīdār-e-matā-e-kāf-e-kufr

garm hai az bas-ki bāzār-e-butāñ

nāla-e-bulbul huā nāqūs-e-dair

gul kiyā jis vaqt gulzār-e-butāñ

ḳhush sadā aatā hai jaañ anhad kā naad

vaañ bharā hai sirr-e-asrār-e-butāñ

hai but-e-ma.anī husainī ai 'turāb'

kyuuñ na būjhūñ us kuuñ sardār-e-butāñ

but-kade mein dekh didar-e-butan

ho raha hai dil giraftar-e-butan

zahida de chhoD masjid ka KHayal

wasl chahta hai to ho yar-e-butan

zulf-e-kaf-e-kufr ka rakh silsila

band gul mein apne zunnar-e-butan

ho KHaridar-e-mata-e-kaf-e-kufr

garm hai az bas-ki bazar-e-butan

nala-e-bulbul hua naqus-e-dair

gul kiya jis waqt gulzar-e-butan

KHush sada aata hai jaan anhad ka nad

wan bhara hai sirr-e-asrar-e-butan

hai but-e-mani husaini ai 'turab'

kyun na bujhun us kun sardar-e-butan