jaane kis ki thi KHata yaad nahin

jaane kis kī thī ḳhatā yaad nahīñ

ham hue kaise judā yaad nahīñ

ek sho.ala-sā uThā thā dil meñ

jaane kis kī thī sadā yaad nahīñ

ek naġhma-sā sunā thā maiñ ne

kaun thā sho.ala-navā yaad nahīñ

roz dohrāte the afsāna-e-dil

kis tarah bhuul gayā yaad nahīñ

ik faqat yaad hai jaanā un kā

aur kuchh is ke sivā yaad nahīñ

tū mirī jān-e-tamannā thī kabhī

ai mirī jān-e-vafā yaad nahīñ

ham bhī the terī tarah āvāra

kyā tujhe bād-e-sabā yaad nahīñ

ham bhī the terī navāoñ meñ sharīk

tā.ir-e-naġhma-sarā yaad nahīñ

hāl-e-dil kaise 'tabassum' ho bayāñ

jaane kyā yaad hai kyā yaad nahīñ

jaane kis ki thi KHata yaad nahin

hum hue kaise juda yaad nahin

ek shoala-sa uTha tha dil mein

jaane kis ki thi sada yaad nahin

ek naghma-sa suna tha main ne

kaun tha shoala-nawa yaad nahin

roz dohraate the afsana-e-dil

kis tarah bhul gaya yaad nahin

ek faqat yaad hai jaana un ka

aur kuchh is ke siwa yaad nahin

tu meri jaan-e-tamanna thi kabhi

ai meri jaan-e-wafa yaad nahin

hum bhi the teri tarah aawara

kya tujhe baad-e-saba yaad nahin

hum bhi the teri nawaon mein sharik

tair-e-naghma-sara yaad nahin

haal-e-dil kaise 'tabassum' ho bayan

jaane kya yaad hai kya yaad nahin