jis manzil-e-maqsud pe dam TuT raha hai

jis manzil-e-maqsūd pe dam TuuT rahā hai

lagtā hai merā ḳhvāb-e-iram TuuT rahā hai

ashkoñ pe mujhe zabt kā ik faḳhr thā lekin

vo sañg-e-yaqīñ terī qasam TuuT rahā hai

lailā se kaho rāh-e-junūñ meñ nikal aa.e

sahrā meñ kahīñ qais kā dam TuuT rahā hai

har shauq har ummīd har ik aarzū sālim

ik dil thā tere zer-e-qadam TuuT rahā hai

ḳhvāhish thī falak-gūñ terī āġhosh rahūñ maiñ

afsos ki vus.at kā bhram TuuT rahā hai

ik baar mere chāñd ko gahnāyā thā us ne

sūraj pe yuuñ rātoñ kā sitam TuuT rahā hai

ik umr guzārī hai terī yaad meñ 'kausar'

aa jā ki merī zulf kā ḳham TuuT rahā hai

jis manzil-e-maqsud pe dam TuT raha hai

lagta hai mera KHwab-e-iram TuT raha hai

ashkon pe mujhe zabt ka ek faKHr tha lekin

wo sang-e-yaqin teri qasam TuT raha hai

laila se kaho rah-e-junun mein nikal aae

sahra mein kahin qais ka dam TuT raha hai

har shauq har ummid har ek aarzu salim

ek dil tha tere zer-e-qadam TuT raha hai

KHwahish thi falak-gun teri aaghosh rahun main

afsos ki wusat ka bhram TuT raha hai

ek bar mere chand ko gahnaya tha us ne

suraj pe yun raaton ka sitam TuT raha hai

ek umr guzari hai teri yaad mein 'kausar'

aa ja ki meri zulf ka KHam TuT raha hai