mere maula kahne ko to duniya mein insan bahut

mere maulā kahne ko to duniyā meñ insān bahut

bandoñ kā bahrūp banā.e phirte haiñ shaitān bahut

maiñ ne to har-sū dekhā ik nafsā-nafsī kā 'ālam

sun rakkhā thā aaj ke daur meñ jiinā hai āsān bahut

makr-o-fareb se pur hai duniyā jānte haiñ lekin phir bhī

khā jaate haiñ aksar dhokā kyūñ-ki haiñ nādān bahut

baḌe 'aqīdat-mañd haiñ un ke garche khaa.e zaḳhm bahut

un kī zaat se yaaro ham ne paayā hai faizān bahut

vā'doñ kā iifā honā kuchh shart nahīñ hai yaarī kī

so ḳhush-fahm dil-e-nādāñ ne bāñdhe haiñ paimān bahut

’aish-o-nishāt se chuñdhī āñkheñ bātin meñ na jhāñk sakīñ

rañj-o-alam ke paimānoñ se apnī hai pahchān bahut

bhed khulā bas itnā ham pe chakh ke 'ilm kā mamnūa phal

aadam ke hisse meñ aayā nafa' kam nuqsān bahut

’aql-o-ḳhirad kī gāḌhī bāteñ falsafiyoñ pe rahne do

ham ko un se kyā lenā ki ham ko hai vijdān bahut

jholī 'amal se ḳhālī lekin dil ummīd se hai mā'mūr

mujh ko bas ye aas hai kaafī rab merā rahmān bahut

mere maula kahne ko to duniya mein insan bahut

bandon ka bahrup banae phirte hain shaitan bahut

main ne to har-su dekha ek nafsa-nafsi ka 'alam

sun rakkha tha aaj ke daur mein jina hai aasan bahut

makr-o-fareb se pur hai duniya jaante hain lekin phir bhi

kha jate hain aksar dhoka kyun-ki hain nadan bahut

baDe 'aqidat-mand hain un ke garche khae zaKHm bahut

un ki zat se yaro hum ne paya hai faizan bahut

wa'don ka ifa hona kuchh shart nahin hai yari ki

so KHush-fahm dil-e-nadan ne bandhe hain paiman bahut

’aish-o-nishat se chundhi aankhen baatin mein na jhank sakin

ranj-o-alam ke paimanon se apni hai pahchan bahut

bhed khula bas itna hum pe chakh ke 'ilm ka mamnua phal

aadam ke hisse mein aaya nafa' kam nuqsan bahut

’aql-o-KHirad ki gaDhi baaten falsafiyon pe rahne do

hum ko un se kya lena ki hum ko hai wijdan bahut

jholi 'amal se KHali lekin dil ummid se hai ma'mur

mujh ko bas ye aas hai kafi rab mera rahman bahut