jab husn-e-azal parda-e-imkan mein aaya

jab husn-e-azal parda-e-imkān meñ aayā

be-rañg ba-har-rañg har ik shaan meñ aayā

avval vahī āḳhir vahī aur zāhir-o-bātin

mazkūr yahī āyat-e-qur.ān meñ aayā

gun hai vahī sumbul hai vahī nargis-e-hairāñ

apne hī tamāshe ko gulistān meñ aayā

hurmat se malā.ik ne use sajda kiyā hai

jis vaqt ki vo sūrat-e-insān meñ aayā

mutrib vahī āvāz vahī saaz vahī hai

har taar meñ bolā vo har ik taan meñ aayā

nazdīk hai vo sab se jahāñ us se hai ma.amūr

jab chashm khulī dil kī to pahchān meñ aayā

be-rañg ke rañgoñ ko yahāñ dekh le 'asġhar'

sau tarah se 'ālam ke kHiyābān meñ aayā

jab husn-e-azal parda-e-imkan mein aaya

be-rang ba-har-rang har ek shan mein aaya

awwal wahi aaKHir wahi aur zahir-o-baatin

mazkur yahi aayat-e-quran mein aaya

gun hai wahi sumbul hai wahi nargis-e-hairan

apne hi tamashe ko gulistan mein aaya

hurmat se malaik ne use sajda kiya hai

jis waqt ki wo surat-e-insan mein aaya

mutrib wahi aawaz wahi saz wahi hai

har tar mein bola wo har ek tan mein aaya

nazdik hai wo sab se jahan us se hai mamur

jab chashm khuli dil ki to pahchan mein aaya

be-rang ke rangon ko yahan dekh le 'asghar'

sau tarah se 'alam ke kHiyaban mein aaya