thi mohabbat kabhi faqat tum se

thī mohabbat kabhī faqat tum se

aaj har chiiz ban ga.ī mahbūb

the kabhī tum hī markaz-e-ḳhūbī

aaj koī bhī shai nahīñ nā-ḳhūb

aaj matlūb zarra zarra hai

tum hī tum the kabhī merā matlūb

ishq mansūb thā kabhī tum se

aaj tum bhī ho ishq se mansūb

maiñ nahīñ maiñ na aaj tum ho tum

ho ga.e ek tālib-o-matlūb

ishq tanhā haqīqat-e-a.alam

ye haqīqat majāz se mahjūb

hosh hai juzv aur mastī kul

husn sālik hai ishq hai majzūb

hoshiyārī hai husn meñ ḳhūbī

hoshiyārī hai ishq meñ ma.ayūb

ik tabassum hai dūsrā hai aah

ek yūsuf hai dūsrā yāqūb

be-qarārī meñ ishq giriyā-e-nūh

sabr meñ ishq hazrat-e-ayyūb

rāh-e-iḳhlās meñ ḳhalīl hai ishq

ishq meñ vahm-e-ġhair hai maslūb

thi mohabbat kabhi faqat tum se

aaj har chiz ban gai mahbub

the kabhi tum hi markaz-e-KHubi

aaj koi bhi shai nahin na-KHub

aaj matlub zarra zarra hai

tum hi tum the kabhi mera matlub

ishq mansub tha kabhi tum se

aaj tum bhi ho ishq se mansub

main nahin main na aaj tum ho tum

ho gae ek talib-o-matlub

ishq tanha haqiqat-e-alam

ye haqiqat majaz se mahjub

hosh hai juzw aur masti kul

husn salik hai ishq hai majzub

hoshiyari hai husn mein KHubi

hoshiyari hai ishq mein mayub

ek tabassum hai dusra hai aah

ek yusuf hai dusra yaqub

be-qarari mein ishq giriya-e-nuh

sabr mein ishq hazrat-e-ayyub

rah-e-iKHlas mein KHalil hai ishq

ishq mein wahm-e-ghair hai maslub