tum ek nigah kabhi dil pe Dal kar dekho

tum ik nigāh kabhī dil pe Daal kar dekho

us aa.ine kī zarā dekh bhaal kar dekho

chalo ye zo.am bhī apnā nikāl kar dekho

tumhāre dar pe huuñ ab mujhe Taal kar dekho

javāb tum ko milegā savāl kar dekho

hamārī āñkhoñ meñ āñkheñ to Daal kar dekho

tumārī raah meñ miTnā hai zindagī merī

yaqīn nahīñ to mujhe pā.emāl kar dekho

ye ġhair hai na kisī kā huā na hogā kabhī

tum āstīn meñ ye saañp paal kar dekho

baḌā hī lutf thā aapas kī us mohabbat meñ

jo ho sake to vo rishte bahāl kar dekho

hazār tāḌne vaale haiñ in ishāroñ ke

idhar udhar bhī zarā dekh-bhāl kar dekho

janāb-e-shaiḳh kisī kī kabhī nahīñ sunte

natīja kuchh bhī nahīñ qīl-o-qāl kar dekho

ḳhumār meñ hoñ to rindoñ kā imtihāñ be-sūd

maza to jab hai ki sāġhar uchhāl kar dekho

nazar kī Thes lagegī to hogā chaknā-chūr

dil ā.īna hai zarā tum sambhāl kar dekho

ummīd-e-vasl nahīñ kuchh javāb to deñge

'nasīr' aaj tum un se savāl kar dekho

tum ek nigah kabhi dil pe Dal kar dekho

us aaine ki zara dekh bhaal kar dekho

chalo ye zoam bhi apna nikal kar dekho

tumhaare dar pe hun ab mujhe Tal kar dekho

jawab tum ko milega sawal kar dekho

hamari aankhon mein aankhen to Dal kar dekho

tumari rah mein miTna hai zindagi meri

yaqin nahin to mujhe paemal kar dekho

ye ghair hai na kisi ka hua na hoga kabhi

tum aastin mein ye sanp pal kar dekho

baDa hi lutf tha aapas ki us mohabbat mein

jo ho sake to wo rishte bahaal kar dekho

hazar taDne wale hain in ishaaron ke

idhar udhar bhi zara dekh-bhaal kar dekho

janab-e-shaiKH kisi ki kabhi nahin sunte

natija kuchh bhi nahin qil-o-qal kar dekho

KHumar mein hon to rindon ka imtihan be-sud

maza to jab hai ki saghar uchhaal kar dekho

nazar ki Thes lagegi to hoga chakna-chur

dil aaina hai zara tum sambhaal kar dekho

ummid-e-wasl nahin kuchh jawab to denge

'nasir' aaj tum un se sawal kar dekho