tumhein hum apna dil samjhe tumhein apni nazar jaana

tumheñ ham apnā dil samjhe tumheñ apnī nazar jaanā

magar tum ne hamāre ishq ko nā-mo'tabar jaanā

mirī zauq-e-jabīñ saaqī kā aalam hī nirālā hai

ki har zarre ko maiñ ne aap hī kā sañg-e-dar jaanā

ham apne azm par qaa.em rahe rāh-e-mohabbat meñ

na āġhāz-e-safar samjhe na anjām-e-safar jaanā

zamāne kī nigāhoñ meñ tumhīñ tum the tumhīñ tum ho

burā kyā hai jo maiñ ne bhī tumheñ jān-e-nazar jaanā

nazāra kar rahe haiñ aaj vo merī tabāhī kā

'azīz-vārsī' achchhā nahīñ aise meñ mar jaanā

tumhein hum apna dil samjhe tumhein apni nazar jaana

magar tum ne hamare ishq ko na-mo'tabar jaana

meri zauq-e-jabin saqi ka aalam hi nirala hai

ki har zarre ko main ne aap hi ka sang-e-dar jaana

hum apne azm par qaem rahe rah-e-mohabbat mein

na aaghaz-e-safar samjhe na anjam-e-safar jaana

zamane ki nigahon mein tumhin tum the tumhin tum ho

bura kya hai jo main ne bhi tumhein jaan-e-nazar jaana

nazara kar rahe hain aaj wo meri tabahi ka

'aziz-warsi' achchha nahin aise mein mar jaana