tegh-o-KHanjar se ziyaada wo asar rakhte hain

teġh-o-ḳhanjar se ziyāda vo asar rakhte haiñ

qatl karne kā jo āñkhoñ meñ hunar rakhte haiñ

un ke sar jhuk nahīñ sakte haiñ kisī ke aage

terī chaukhaT pe shab-o-roz jo sar rakhte haiñ

yaad karte hī madad ke liye fauran aa.e

apne dīvāne kī vo kitnī ḳhabar rakhte haiñ

is tarah dekho to ham donoñ meñ ik rishta hai

husn tum rakhte ho ham husn-e-nazar rakhte haiñ

bandagī kyā hai batāte haiñ makīñ karbal ke

jaan ḳhatre meñ hai par sajde meñ sar rakhte haiñ

laaj rakh letī hai nisbat tirī har mushkil meñ

tere azkār balāoñ pe asar rakhte haiñ

zaḳhm siine ke dikhāoge kise tum 'mohsin'

sañg ke jaisā sabhī log jigar rakhte haiñ

tegh-o-KHanjar se ziyaada wo asar rakhte hain

qatl karne ka jo aankhon mein hunar rakhte hain

un ke sar jhuk nahin sakte hain kisi ke aage

teri chaukhaT pe shab-o-roz jo sar rakhte hain

yaad karte hi madad ke liye fauran aae

apne diwane ki wo kitni KHabar rakhte hain

is tarah dekho to hum donon mein ek rishta hai

husn tum rakhte ho hum husn-e-nazar rakhte hain

bandagi kya hai batate hain makin karbal ke

jaan KHatre mein hai par sajde mein sar rakhte hain

laj rakh leti hai nisbat teri har mushkil mein

tere azkar balaon pe asar rakhte hain

zaKHm sine ke dikhaoge kise tum 'mohsin'

sang ke jaisa sabhi log jigar rakhte hain