تیغ و خنجر سے زیادہ وہ اثر رکھتے ہیں

تیغ و خنجر سے زیادہ وہ اثر رکھتے ہیں

قتل کرنے کا جو آنکھوں میں ہنر رکھتے ہیں

ان کے سر جھک نہیں سکتے ہیں کسی کے آگے

تیری چوکھٹ پہ شب و روز جو سر رکھتے ہیں

یاد کرتے ہی مدد کے لیے فوراً آئے

اپنے دیوانے کی وہ کتنی خبر رکھتے ہیں

اس طرح دیکھو تو ہم دونوں میں اک رشتہ ہے

حسن تم رکھتے ہو ہم حسنِ نظر رکھتے ہیں

بندگی کیا ہے بتاتے ہیں مکیں کربل کے

جان خطرے میں ہے پر سجدے میں سر رکھتے ہیں

لاج رکھ لیتی ہے نسبت تری ہر مشکل میں

تیرے اذکار بلاؤں پہ اثر رکھتے ہیں

زخم سینے کے دکھاؤ گے کسے تم محسنؔ

سنگ کے جیسا سبھی لوگ جگر رکھتے ہیں