unki yaad aae to kuchh us ka taqaza hoga

un kī yaad aa.e to kuchh us kā taqāza hogā

sochtā huuñ vo rahe yaad to phir kyā hogā

chain thā us kī huzūrī meñ na duurī meñ sukūñ

umr bhar us kī mohabbat meñ taḌapnā hogā

jis ne dekhā tujhe ai dost khulī āñkhoñ se

vo samajhtā hai kabhī ḳhvāb meñ dekhā hogā

khul gayā raaz agar husn kī yaktā.ī kā

ham burā jis ko samajhte haiñ vo achchhā hogā

ḳhalvat-e-ārā hai bharī bazm meñ vo paikar-e-nāz

apnī ḳhalvat meñ na kyuuñ anjuman-ārā hogā

a.alam-e-hosh ho yā jalva-gah-e-jāñ ho 'zahīn'

maiñ ḳhud aayā nahīñ koī mujhe laayā hogā

un ki yaad aae to kuchh us ka taqaza hoga

sochta hun wo rahe yaad to phir kya hoga

chain tha us ki huzuri mein na duri mein sukun

umr bhar us ki mohabbat mein taDapna hoga

jis ne dekha tujhe ai dost khuli aankhon se

wo samajhta hai kabhi KHwab mein dekha hoga

khul gaya raaz agar husn ki yaktai ka

hum bura jis ko samajhte hain wo achchha hoga

KHalwat-e-ara hai bhari bazm mein wo paikar-e-naz

apni KHalwat mein na kyun anjuman-ara hoga

aalam-e-hosh ho ya jalwa-gah-e-jaan ho 'zahin'

main KHud aaya nahin koi mujhe laya hoga