saman-e-aish-o-naz hai aazar-e-jaan mujhe

sāmān-e-'aish-o-nāz hai āzār-e-jāñ mujhe

laayā hai terā shauq kahāñ se kahāñ mujhe

chhupte hī mere zauq-e-nazar kā uThā hijāb

taḌpā rahī hai merī nigāh-e-tapāñ mujhe

kyuuñ hirs dī ki saarī ’atā buḳhl hoga.ī

kuchh kabhī nahīñ diye jo diye do-jahāñ mujhe

hāshā ki but-parast hai ḳhud sūrat-āfrīñ

āḳhir ko husn-e-zan ne kiyā bad-gumāñ mujhe

lutf-o-ġhazab ke vāste hai mashvarat zarūr

gar ġhair hai nadīm to kar rāz-dāñ mujhe

sarfa na kuchh use na tujhe zulm meñ dareġh

aġhyār kā na rañj de ai āsmāñ mujhe

ye bhī nikālā jā.egā is jurm par zarūr

rakhtā hai ab nazar meñ tirā pāsbāñ mujhe

aisā vo muñh ko moḌ ke sab se gayā 'qalaq'

'ain āsmāñ ko dekhtā huuñ āsmāñ mujhe

saman-e-'aish-o-naz hai aazar-e-jaan mujhe

laya hai tera shauq kahan se kahan mujhe

chhupte hi mere zauq-e-nazar ka uTha hijab

taDpa rahi hai meri nigah-e-tapan mujhe

kyun hirs di ki sari ’ata buKHl hogai

kuchh kabhi nahin diye jo diye do-jahan mujhe

hasha ki but-parast hai KHud surat-afrin

aaKHir ko husn-e-zan ne kiya bad-guman mujhe

lutf-o-ghazab ke waste hai mashwarat zarur

gar ghair hai nadim to kar raaz-dan mujhe

sarfa na kuchh use na tujhe zulm mein daregh

aghyar ka na ranj de ai aasman mujhe

ye bhi nikala jaega is jurm par zarur

rakhta hai ab nazar mein tera pasban mujhe

aisa wo munh ko moD ke sab se gaya 'qalaq'

'ain aasman ko dekhta hun aasman mujhe