har shai mein ayan jalwa-e-zeba hai tumhaara

har shai meñ 'ayāñ jalva-e-zebā hai tumhārā

aur ḳhud ho nihāñ ḳhuub ye pardā hai tumhārā

thā dair-o-haram ek jo tum chhupte na sāhib

Daalā huā ye biich meñ jhagḌā hai tumhārā

kyuuñ ham se ḳhatā-varoñ pe ḳhafagī kī nazar hai

jo nek hai yā bad hai vo bandā hai tumhārā

bin dekhe huā tālib-e-dīdār zamāna

jaadū hai ye jo shai hai karishma hai tumhārā

nazdīk bhī tum rahte ho aur duur bhī sab se

ye tarz bhī duniyā se nirālā hai tumhārā

ġhurfa se zarā jhāñk ke ye jalsa to paatī

'ushshāq taḌapte haiñ tamāshā hai tumhārā

us ḳhaak ke putle meñ tajallī hai tumhārī

sūrat jo hamārī hai vo naqsha hai tumhārā

dil de ke tumheñ hotā na 'mumtāz' pareshāñ

par kyā kare andāz hī achchhā hai tumhārā

har shai mein 'ayan jalwa-e-zeba hai tumhaara

aur KHud ho nihan KHub ye parda hai tumhaara

tha dair-o-haram ek jo tum chhupte na sahib

Dala hua ye bich mein jhagDa hai tumhaara

kyun hum se KHata-waron pe KHafagi ki nazar hai

jo nek hai ya bad hai wo banda hai tumhaara

bin dekhe hua talib-e-didar zamana

jadu hai ye jo shai hai karishma hai tumhaara

nazdik bhi tum rahte ho aur dur bhi sab se

ye tarz bhi duniya se nirala hai tumhaara

ghurfa se zara jhank ke ye jalsa to pati

'ushshaq taDapte hain tamasha hai tumhaara

us KHak ke putle mein tajalli hai tumhaari

surat jo hamari hai wo naqsha hai tumhaara

dil de ke tumhein hota na 'mumtaz' pareshan

par kya kare andaz hi achchha hai tumhaara