ہر شے میں عیاں جلوۂ زیبا ہے تمہارا

ہر شے میں عیاں جلوۂ زیبا ہے تمہارا

اور خود ہو نہاں خوب یہ پردا ہے تمہارا

تھا دیر و حرم ایک جو تم چھپتے نہ صاحب

ڈالا ہوا یہ بیچ میں جھگڑا ہے تمہارا

کیوں ہم سے خطا واروں پہ خفگی کی نظر ہے

جو نیک ہے یا بد ہے وہ بندا ہے تمہارا

بن دیکھے ہوا طالب دیدار زمانہ

جادو ہے یہ جو شے ہے کرشمہ ہے تمہارا

نزدیک بھی تم رہتے ہو اور دور بھی سب سے

یہ طرز بھی دنیا سے نرالا ہے تمہارا

غرفہ سے ذرا جھانک کے یہ جلسہ تو دیکھو

عشاق تڑپتے ہیں تماشا ہے تمہارا

اس خاک کے پتلے میں تجلی ہے تمہاری

صورت جو ہماری ہے وہ نقشہ ہے تمہارا

دل دے کے تمہیں ہوتا نہ ممتازؔ پریشاں

پر کیا کرے انداز ہی اچھا ہے تمہارا