aankhon mein wo rahte hain wahi dil mein makin hain

āñkhoñ meñ vo rahte haiñ vahī dil meñ makīñ haiñ

aur ḳhud ye samajhte haiñ ki ham parda-nashīñ haiñ

haiñ sab se judā sab meñ mile vaah re shoḳhī

ye vasf unhīñ meñ hai ki haiñ aur nahīñ haiñ

go ḳhud to vo kahte haiñ ki ham paas haiñ sab ke

par ġhaur se dekho to kahīñ the na kahīñ haiñ

DhūñDeñ to kahāñ DhūñDeñ unheñ tālib-e-dīdār

zāhir meñ kahīñ rahte haiñ bātin meñ kahīñ haiñ

'mumtāz' ne duniyā meñ koī tum sā na dekhā

yuuñ kahne ko duniyā meñ hazāroñ hī hasīñ haiñ

aankhon mein wo rahte hain wahi dil mein makin hain

aur KHud ye samajhte hain ki hum parda-nashin hain

hain sab se juda sab mein mile wah re shoKHi

ye wasf unhin mein hai ki hain aur nahin hain

go KHud to wo kahte hain ki hum pas hain sab ke

par ghaur se dekho to kahin the na kahin hain

DhunDen to kahan DhunDen unhen talib-e-didar

zahir mein kahin rahte hain baatin mein kahin hain

'mumtaz' ne duniya mein koi tum sa na dekha

yun kahne ko duniya mein hazaron hi hasin hain