wo chale jhaTak ke daman mere dast-e-na-tawan se

vo chale jhaTak ke dāman mire dast-e-nā-tavāñ se

usī din kā aasrā thā mujhe marg-e-nā-gahāñ se

ye hijāb-e-kufr-o-īmāñ bhī haTā do darmiyāñ se

ki maqām-e-qarb aage hai hudūd-e-do-jahāñ se

mirī tarah thak na jaaye kahīñ hasrat-e-fasurda

ki lipaT ke chal to dī hai vo ġhubār kārvāñ se

mujhe shauq se taġhāful tirā pā.emāl kar de

mirā sar uThā na uThe tire sañg āstāñ se

tire mai-kada kā saaqī hai bayāñ bhī kaif āgīñ

ki havā ko hai tavājud mire nudrat-e-bayāñ se

mirī be-kasī kā a.alam koī us ke jī se pūchhe

mirī tarah luT gayā ho bichhaḌ ke kārvāñ se

jo ḳhayāl meñ bhī chhūTe dar-e-pāk terā mujh se

to lipaT ke roiiñ mujh se tere sañg āstāñ se

tirī rahguzar tak ai jaañ jo nasīb ho rasā.ī

malūñ āñkheñ apnī naqsh-e-kaf-e-pā-e-sārbāñ se

vahī gūñjtī haiñ ab tak mire kaan meñ sadā.eñ

jo sunā thā zamzama ik kabhī sāz-e-kun-fakāñ se

na ho paas parda un ko ye parda-dāriyāñ hoñ

mirī dukh-bharī kahānī jo sune mirī zabāñ se

mirī chashm-e-hasrat-āgīñ ye ḳharābiyāñ na dekhe

jo qafas ko duur rakh de koī mere āshiyāñ se

mujhe ḳhaak meñ milā kar mirī ḳhaak bhī uḌā de

tire naam par miTā huuñ mujhe kyā ġharaz nishāñ se

isī ḳhāk-e-āstāñ meñ kisī din fanā bhī hogā

ki banā huā hai 'bedam' usī ḳhāk-e-āstāñ se

wo chale jhaTak ke daman mere dast-e-na-tawan se

usi din ka aasra tha mujhe marg-e-na-gahan se

ye hijab-e-kufr-o-iman bhi haTa do darmiyan se

ki maqam-e-qarb aage hai hudud-e-do-jahan se

meri tarah thak na jaye kahin hasrat-e-fasurda

ki lipaT ke chal to di hai wo ghubar karwan se

mujhe shauq se taghaful tera paemal kar de

mera sar uTha na uThe tere sang aastan se

tere mai-kada ka saqi hai bayan bhi kaif aagin

ki hawa ko hai tawajud mere nudrat-e-bayan se

meri be-kasi ka aalam koi us ke ji se puchhe

meri tarah luT gaya ho bichhaD ke karwan se

jo KHayal mein bhi chhuTe dar-e-pak tera mujh se

to lipaT ke roin mujh se tere sang aastan se

teri rahguzar tak ai jaan jo nasib ho rasai

malun aankhen apni naqsh-e-kaf-e-pa-e-sarban se

wahi gunjti hain ab tak mere kan mein sadaen

jo suna tha zamzama ek kabhi saz-e-kun-fakan se

na ho pas parda un ko ye parda-dariyan hon

meri dukh-bhari kahani jo sune meri zaban se

meri chashm-e-hasrat-agin ye KHarabiyan na dekhe

jo qafas ko dur rakh de koi mere aashiyan se

mujhe KHak mein mila kar meri KHak bhi uDa de

tere nam par miTa hun mujhe kya gharaz nishan se

isi KHak-e-astan mein kisi din fana bhi hoga

ki bana hua hai 'bedam' usi KHak-e-astan se