wo kya hai tera jis mein jalwa nahin hai

vo kyā hai tirā jis meñ jalvā nahīñ hai

na dekhe tujhe koī andhā nahīñ hai

kahāñ dāman-e-husn āshiq se aTkā

gul-e-dāġh-e-ulfat meñ kāñTā nahīñ hai

kiyā hai vahāñ us ne paimān-e-fardā

yahāñ hai vo shab jis ko fardā nahīñ hai

vo kahte haiñ maiñ zindagānī huuñ terī

ye sach hai to un kā bharosā nahīñ hai

mirī ziist kyuuñ kar na ho jāvedānī

jo martā hai us par vo martā nahīñ hai

vahī ḳhaak uḌānā vahī gardisheñ haiñ

ye maanā ki āshiq bagūlā nahīñ hai

gulū-gīr hai un bhavoñ kā tasavvur

garebān meñ apne kanThā nahīñ hai

in āñkhoñ ko jab se basārat milī hai

sivā tere kuchh maiñ ne dekhā nahīñ hai

mirī hasrateñ is qadar baḌh ga.ī haiñ

ki ab tere kūche meñ rastā nahīñ hai

vo dil kyā jo dilbar kī sūrat na pakḌe

vo majnūñ nahīñ hai jo lailā nahīñ hai

kamāl-e-zuhūr-e-tajallī se jaanā

jo pinhāñ nahīñ hai vo paidā nahīñ hai

wo kya hai tera jis mein jalwa nahin hai

na dekhe tujhe koi andha nahin hai

kahan daman-e-husn aashiq se aTka

gul-e-dagh-e-ulfat mein kanTa nahin hai

kiya hai wahan us ne paiman-e-farda

yahan hai wo shab jis ko farda nahin hai

wo kahte hain main zindagani hun teri

ye sach hai to un ka bharosa nahin hai

meri zist kyun kar na ho jawedani

jo marta hai us par wo marta nahin hai

wahi KHak uDana wahi gardishen hain

ye mana ki aashiq bagula nahin hai

gulu-gir hai un bhawon ka tasawwur

gareban mein apne kanTha nahin hai

in aankhon ko jab se basarat mili hai

siwa tere kuchh main ne dekha nahin hai

meri hasraten is qadar baDh gai hain

ki ab tere kuche mein rasta nahin hai

wo dil kya jo dilbar ki surat na pakDe

wo majnun nahin hai jo laila nahin hai

kamal-e-zuhur-e-tajalli se jaana

jo pinhan nahin hai wo paida nahin hai