wo teri nigahon ka aalam jo mast-e-kun-o-mastana tha

vo terī nigāhoñ kā a.alam jo mast-e-kun-o-mastāna thā

mai-ḳhāne kā mai-ḳhāna thā paimāne kā paimāna thā

ābādī-e-dil kā a.alam bhī ik ḳhvāb thā yā afsāna thā

jab aañkh lagī kāshāna thā jab aañkh khulī vīrāna thā

mauqūf thī dil kī hālat par vīrānī bhī ābādī bhī

vīrāna bhī kāshāna thā kāshāna bhī vīrāna thā

ādāb-e-tamāshā se vāqif kab shaiḳh-o-barhaman the varna

but-ḳhāne meñ bhī ka.aba thā ka.abe meñ bhī but-ḳhāna thā

jab ishq meñ gum atrāf huī jab soz meñ mahv-e-jihāt huiiñ

jo sham.a thī vo parvāna thā vo sham.a thī jo parvāna thā

kuchh terī zulf-e-mushkīñ ke asrār khule to mastī meñ

dīvāna thā vo hosh meñ thā jo hosh meñ thā dīvāna thā

kyā jaane kis ne kyā samjhā andāz-e-bayān-e-'zahīn' thā kyā

har lafz meñ ek haqīqat thī har lafz magar afsāna thā

wo teri nigahon ka aalam jo mast-e-kun-o-mastana tha

mai-KHane ka mai-KHana tha paimane ka paimana tha

aabaadi-e-dil ka aalam bhi ek KHwab tha ya afsana tha

jab aankh lagi kashana tha jab aankh khuli virana tha

mauquf thi dil ki haalat par virani bhi aabaadi bhi

virana bhi kashana tha kashana bhi virana tha

aadab-e-tamasha se waqif kab shaiKH-o-barhaman the warna

but-KHane mein bhi kaba tha kabe mein bhi but-KHana tha

jab ishq mein gum atraf hui jab soz mein mahw-e-jihat huin

jo shama thi wo parwana tha wo shama thi jo parwana tha

kuchh teri zulf-e-mushkin ke asrar khule to masti mein

diwana tha wo hosh mein tha jo hosh mein tha diwana tha

kya jaane kis ne kya samjha andaz-e-bayan-e-'zahin' tha kya

har lafz mein ek haqiqat thi har lafz magar afsana tha