yarab jo Khaar-e-gham hain jala de unhon ke tain

yārab jo ḳhār-e-ġham haiñ jalā de unhoñ ke ta.iiñ

jo ġhuncha-e-tarab haiñ khilā de unhoñ ke ta.iiñ

inkār-e-hashr jin ko hai ai sarv-e-ḳhush-ḳhirām

yak-bār apne qad ko dikhā de unhoñ ke ta.iiñ

kahte haiñ abrū-o-mizha ḳhūñ-rez haiñ tirī

zālim kabhī hameñ bhī batā de unhoñ ke ta.iiñ

us sham.a-rū kā mujh se jo karte haiñ sard dil

ai āh-e-soz-nāk jalā de unhoñ ke ta.iiñ

sozāñ hai dāġh-e-hijr mire dil meñ misl-e-sham.a

ai yād-e-vasl-e-yār bujhā de unhoñ ke ta.iiñ

karte haiñ sar-kashī jo kaf-e-pā se aable

ai ḳhār-e-dasht-e-ishq biThā de unhoñ ke ta.iiñ

jo sāf-o-be-ġhubār haiñ 'bedār' āshnā

juuñ surma apnī chashm meñ jā de unhoñ ke ta.iiñ

yarab jo KHar-e-gham hain jala de unhon ke tain

jo ghuncha-e-tarab hain khila de unhon ke tain

inkar-e-hashr jin ko hai ai sarw-e-KHush-KHiram

yak-bar apne qad ko dikha de unhon ke tain

kahte hain abru-o-mizha KHun-rez hain teri

zalim kabhi hamein bhi bata de unhon ke tain

us shama-ru ka mujh se jo karte hain sard dil

ai aah-e-soz-nak jala de unhon ke tain

sozan hai dagh-e-hijr mere dil mein misl-e-shama

ai yaad-e-wasl-e-yar bujha de unhon ke tain

karte hain sar-kashi jo kaf-e-pa se aable

ai KHar-e-dasht-e-ishq biTha de unhon ke tain

jo saf-o-be-ghubar hain 'bedar' aashna

jun surma apni chashm mein ja de unhon ke tain