zindagi jis par hanse aisi koi KHwahish na ki

zindagī jis par hañse aisī koī ḳhvāhish na kī

ghaav siine meñ sajā.e ghar kī ārā.ish na kī

nukta-chīnī par mirī tum itne bargashta na ho

kah diyā jo kuchh bhī dil meñ thā magar sāzish na kī

ek se hālāt aa.e haiñ nazar har daur meñ

ruk ga.e mere qadam yā vaqt ne gardish na kī

jhuk gayā qadmoñ pe tere phir bhī sar ūñchā rahā

aañkh patthar ho ga.ī jalvoñ kī farmā.ish na kī

laakh nazroñ ko uchhālā tū na aayā baam par

saa.e sar paTḳhā kiye dīvār ne jumbish na kī

maiñ ne jin āñkhoñ ko siine meñ utārā phir ga.iiñ

ḳhud ko apnāne kī is Dar se kabhī koshish na kī

rah ke mahdūd-e-vasā.il kī 'muzaffar' ne basar

paañv phailā kar kabhī chādar kī paimā.ish na kī

zindagi jis par hanse aisi koi KHwahish na ki

ghaw sine mein sajae ghar ki aaraish na ki

nukta-chini par meri tum itne bargashta na ho

kah diya jo kuchh bhi dil mein tha magar sazish na ki

ek se haalat aae hain nazar har daur mein

ruk gae mere qadam ya waqt ne gardish na ki

jhuk gaya qadmon pe tere phir bhi sar uncha raha

aankh patthar ho gai jalwon ki farmaish na ki

lakh nazron ko uchhaala tu na aaya baam par

sae sar paTKHa kiye diwar ne jumbish na ki

main ne jin aankhon ko sine mein utara phir gain

KHud ko apnane ki is Dar se kabhi koshish na ki

rah ke mahdud-e-wasail ki 'muzaffar' ne basar

panw phaila kar kabhi chadar ki paimaish na ki