aae kuchh abr kuchh sharab aae

aa.e kuchh abr kuchh sharāb aa.e

is ke baa'd aa.e jo azaab aa.e

bām-e-mīnā se māhtāb utre

dast-e-sāqī meñ āftāb aa.e

har rag-e-ḳhūñ meñ phir charāġhāñ ho

sāmne phir vo be-naqāb aa.e

'umr ke har varaq pe dil kī nazar

terī mehr-o-vafā ke baab aa.e

kar rahā thā ġham-e-jahāñ kā hisāb

aaj tum yaad be-hisāb aa.e

na ga.ī tere ġham kī sardārī

dil meñ yuuñ roz inqilāb aa.e

jal uThe bazm-e-ġhair ke dar-o-bām

jab bhī ham ḳhānumāñ-ḳharāb aa.e

is tarah apnī ḳhāmushī gūñjī

goyā har samt se javāb aa.e

'faiz' thī raah sar-ba-sar manzil

ham jahāñ pahuñche kāmyāb aa.e

aae kuchh abr kuchh sharab aae

is ke ba'd aae jo azab aae

baam-e-mina se mahtab utre

dast-e-saqi mein aaftab aae

har rag-e-KHun mein phir charaghan ho

samne phir wo be-naqab aae

'umr ke har waraq pe dil ki nazar

teri mehr-o-wafa ke bab aae

kar raha tha gham-e-jahan ka hisab

aaj tum yaad be-hisab aae

na gai tere gham ki sardari

dil mein yun roz inqilab aae

jal uThe bazm-e-ghair ke dar-o-baam

jab bhi hum KHanuman-KHarab aae

is tarah apni KHamushi gunji

goya har samt se jawab aae

'faiz' thi rah sar-ba-sar manzil

hum jahan pahunche kaamyab aae