aah ko chahiye ek umr asar hote tak

aah ko chāhiye ik 'umr asar hote tak

kaun jiitā hai tirī zulf ke sar hote tak

dām-e-har-mauj meñ hai halqa-e-sad-kām-e-nahañg

dekheñ kyā guzre hai qatre pe guhar hote tak

'āshiqī sabr-talab aur tamannā betāb

dil kā kyā rañg karūñ ḳhūn-e-jigar hote tak

tā-qayāmat shab-e-furqat meñ guzar jā.egī 'umr

saat din ham pe bhī bhārī haiñ sahar hote tak

ham ne maanā ki taġhāful na karoge lekin

ḳhaak ho jā.eñge ham tum ko ḳhabar hote tak

partav-e-ḳhur se hai shabnam ko fanā kī tā'līm

maiñ bhī huuñ ek 'ināyat kī nazar hote tak

yak nazar besh nahīñ fursat-e-hastī ġhāfil

garmī-e-bazm hai ik raqs-e-sharar hote tak

ġham-e-hastī kā 'asad' kis se ho juz marg 'ilāj

shama' har rañg meñ jaltī hai sahar hote tak

aah ko chahiye ek 'umr asar hote tak

kaun jita hai teri zulf ke sar hote tak

dam-e-har-mauj mein hai halqa-e-sad-kaam-e-nahang

dekhen kya guzre hai qatre pe guhar hote tak

'ashiqi sabr-talab aur tamanna betab

dil ka kya rang karun KHun-e-jigar hote tak

ta-qayamat shab-e-furqat mein guzar jaegi 'umr

sat din hum pe bhi bhaari hain sahar hote tak

hum ne mana ki taghaful na karoge lekin

KHak ho jaenge hum tum ko KHabar hote tak

partaw-e-KHur se hai shabnam ko fana ki ta'lim

main bhi hun ek 'inayat ki nazar hote tak

yak nazar besh nahin fursat-e-hasti ghafil

garmi-e-bazm hai ek raqs-e-sharar hote tak

gham-e-hasti ka 'asad' kis se ho juz marg 'ilaj

shama' har rang mein jalti hai sahar hote tak