aaj yun mauj-dar-mauj gham tham gaya is tarah gham-zadon ko qarar aa gaya

aaj yuuñ mauj-dar-mauj ġham tham gayā is tarah ġham-zadoñ ko qarār aa gayā

jaise ḳhush-bū-e-zulf-e-bahār aa ga.ī jaise paiġhām-e-dīdār-e-yār aa gayā

jis kī dīd-o-talab vahm samjhe the ham rū-ba-rū phir sar-e-rahguzār aa gayā

sub.h-e-fardā ko phir dil tarasne lagā umr-e-rafta tirā e'tibār aa gayā

rut badalne lagī rañg-e-dil dekhnā rañg-e-gulshan se ab haal khultā nahīñ

zaḳhm chhalkā koī yā koī gul khilā ashk umDe ki abr-e-bahār aa gayā

ḳhūn-e-ushshāq se jaam bharne lage dil sulagne lage daaġh jalne lage

mahfil-e-dard phir rañg par aa ga.ī phir shab-e-ārzū par nikhār aa gayā

sarfaroshī ke andāz badle ga.e dāvat-e-qatl par maqtal-e-shahr meñ

Daal kar koī gardan meñ tauq aa gayā laad kar koī kāñdhe pe daar aa gayā

'faiz' kyā jāniye yaar kis aas par muntazir haiñ ki lā.egā koī ḳhabar

mai-kashoñ par huā mohtasib mehrbāñ dil-figāroñ pe qātil ko pyaar aa gayā

aaj yun mauj-dar-mauj gham tham gaya is tarah gham-zadon ko qarar aa gaya

jaise KHush-bu-e-zulf-e-bahaar aa gai jaise paigham-e-didar-e-yar aa gaya

jis ki did-o-talab wahm samjhe the hum ru-ba-ru phir sar-e-rahguzar aa gaya

subh-e-farda ko phir dil tarasne laga umr-e-rafta tera e'tibar aa gaya

rut badalne lagi rang-e-dil dekhna rang-e-gulshan se ab haal khulta nahin

zaKHm chhalka koi ya koi gul khila ashk umDe ki abr-e-bahaar aa gaya

KHun-e-ushshaq se jam bharne lage dil sulagne lage dagh jalne lage

mahfil-e-dard phir rang par aa gai phir shab-e-arzu par nikhaar aa gaya

sarfaroshi ke andaz badle gae dawat-e-qatl par maqtal-e-shahr mein

Dal kar koi gardan mein tauq aa gaya lad kar koi kandhe pe dar aa gaya

'faiz' kya jaaniye yar kis aas par muntazir hain ki laega koi KHabar

mai-kashon par hua mohtasib mehrban dil-figaron pe qatil ko pyar aa gaya