taiba se mangai jati hai sine mein chhupai jati hai

taiba se mañgā.ī jaatī hai siine meñ chhupā.ī jaatī hai

tauhīd kī mai-e-sāġhar se nahīñ āñkhoñ se pilā.ī jaatī hai

masjid meñ nahīñ mandir meñ nahīñ maktab meñ nahīñ ma.abad meñ nahīñ

sunte haiñ kitāb-e-'ishq tire kūche meñ paḌhā.ī jaatī hai

ham dil meñ biThā kar us but kī har roz parastish karte haiñ

allāh re tasvīr-e-jāñ ka.abe meñ sajā.ī jaatī hai

allāh kare us chaukhaT tak apnī bhī rasā.ī ho jaa.e

jis chaukhaT par dīvānoñ kī taqdīr banā.ī jaatī hai

is hijr ke jiine se 'āzam' marnā hī gavārā hai mujh ko

sunte haiñ lahad meñ hazrat kī tasvīr dikhā.ī jaatī hai

taiba se mangai jati hai sine mein chhupai jati hai

tauhid ki mai-e-saghar se nahin aankhon se pilai jati hai

masjid mein nahin mandir mein nahin maktab mein nahin mabad mein nahin

sunte hain kitab-e-'ishq tere kuche mein paDhai jati hai

hum dil mein biTha kar us but ki har roz parastish karte hain

allah re taswir-e-jaan kabe mein sajai jati hai

allah kare us chaukhaT tak apni bhi rasai ho jae

jis chaukhaT par diwanon ki taqdir banai jati hai

is hijr ke jine se 'azam' marna hi gawara hai mujh ko

sunte hain lahad mein hazrat ki taswir dikhai jati hai