shikwa kisi se kya karen be-dad yar ka

shikvā kisī se kyā kareñ be-dād yaar kā

afsāna kyā sunā.eñ dil-e-be-qarār kā

ai ham-nashīñ na pūchh ki muddat ke ba.ad aaj

muñh dekhnā nasīb huā hai bahār kā

ban-ban ke ashk bah ga.e armān hā-e-dil

kaam aa gayā hai ronā shab-e-intizār kā

be-gāna-e-firāq se ye tazkira na chheḌ

ham dil jaloñ se pūchh mazā intizār kā

'āzam' junūñ ne chhīn liye hosh bhī mire

har ik se pūchhtā huuñ pata kū-e-yār kā

shikwa kisi se kya karen be-dad yar ka

afsana kya sunaen dil-e-be-qarar ka

ai ham-nashin na puchh ki muddat ke baad aaj

munh dekhna nasib hua hai bahaar ka

ban-ban ke ashk bah gae arman ha-e-dil

kaam aa gaya hai rona shab-e-intizar ka

be-gana-e-firaq se ye tazkira na chheD

hum dil jalon se puchh maza intizar ka

'azam' junun ne chhin liye hosh bhi mere

har ek se puchhta hun pata ku-e-yar ka