har shaKHs gham-e-hijr ka afsana kahe hai

har shaḳhs ġham-e-hijr kā afsāna kahe hai

rag-rag meñ vahī haiñ tirā dīvāna kahe hai

hai bā’is-e-taskīñ vo hī har rañj-o-alam meñ

duniyā jise andāz-e-raqībāna kahe hai

us dil meñ biThā kar but-e-kāfir ko maiñ pūjūñ

kahtā hai koī dil ko tu but-ḳhāna kahe hai

jo vasl kā tālib hai to jal ātish-e-ġham meñ

jal kar sar-e-mahfil ye hī parvāna kahe hai

kā'ba hai yahī dil ye hī but-ḳhāna hai vā’iz

dīvāna jise maskan-e-jānāna kahe hai

ye 'ain-e-haqīqat hai mohabbat meñ ai 'kāvish'

duniyā jise mansūr kā afsāna kahe hai

har shaKHs gham-e-hijr ka afsana kahe hai

rag-rag mein wahi hain tera diwana kahe hai

hai ba’is-e-taskin wo hi har ranj-o-alam mein

duniya jise andaz-e-raqibana kahe hai

us dil mein biTha kar but-e-kafir ko main pujun

kahta hai koi dil ko tu but-KHana kahe hai

jo wasl ka talib hai to jal aatish-e-gham mein

jal kar sar-e-mahfil ye hi parwana kahe hai

ka'ba hai yahi dil ye hi but-KHana hai wa’iz

diwana jise maskan-e-jaanana kahe hai

ye 'ain-e-haqiqat hai mohabbat mein ai 'kawish'

duniya jise mansur ka afsana kahe hai