ai mah-jabin kahan tera jalwa ayan nahin

ai mah-jabīñ kahāñ terā jalva ayaañ nahīñ

ye sab tere nishāñ haiñ pe terā nishāñ nahīñ

ka.aba meñ karbalā meñ kalīsā meñ dair meñ

us be-nishāñ ko ham ne bhī DhūñDhā kahāñ nahīñ nahīñ

iqrār roz karte ho ġhairoñ se vasl kā

sīkhe ho ek mere liye jān-e-jāñ nahīñ

kartā hai merā va.ada-farāmosh mujh ko yaad

be-vaj.h aa jaatī haiñ ye hichkiyāñ nahīñ

minnat se pūchhā kyā na karoge jafā.eñ kam

saffāk kis DhiTā.ī se bolā ki haañ nahīñ

shikva kujā shikāyat-e-ġham kiije kyā majāl

us kā ye hukm hai ki hilāo zabāñ nahīñ

sachche tumhīñ sahī maiñ burā huuñ burā magar

mujh sā malegā ba.ad mere mehrbāñ nahīñ

vaa.iz bhalā hasīnoñ kī ulfat hai kyuuñ harām

shāyad ḳhudā kī shaan ye husn-e-butāñ nahīñ

'aughat' jahāñ meñ ab dil-o-dīñ pūchhtā hai kaun

āshiq kā in butoñ meñ koī qadar-dāñ nahīñ

ai mah-jabin kahan tera jalwa ayan nahin

ye sab tere nishan hain pe tera nishan nahin

kaba mein karbala mein kalisa mein dair mein

us be-nishan ko hum ne bhi DhunDha kahan nahin nahin

iqrar roz karte ho ghairon se wasl ka

sikhe ho ek mere liye jaan-e-jaan nahin

karta hai mera wada-faramosh mujh ko yaad

be-wajh aa jati hain ye hichkiyan nahin

minnat se puchha kya na karoge jafaen kam

saffak kis DhiTai se bola ki han nahin

shikwa kuja shikayat-e-gham kije kya majal

us ka ye hukm hai ki hilao zaban nahin

sachche tumhin sahi main bura hun bura magar

mujh sa malega baad mere mehrban nahin

waiz bhala hasinon ki ulfat hai kyun haram

shayad KHuda ki shan ye husn-e-butan nahin

'aughat' jahan mein ab dil-o-din puchhta hai kaun

aashiq ka in buton mein koi qadar-dan nahin