aaina kyun na dun ki tamasha kahen jise

ā.īna kyuuñ na duuñ ki tamāshā kaheñ jise

aisā kahāñ se lā.ūñ ki tujh sā kaheñ jise

hasrat ne lā rakhā tirī bazm-e-ḳhayāl meñ

gul-dasta-e-nigāh suvaidā kaheñ jase

phūñkā hai kis ne gosh-e-mohabbat meñ ai ḳhudā

afsūn-e-intizār tamannā kaheñ jise

sar par hujūm-e-dard-e-ġharībī se Dāliye

vo ek musht-e-ḳhāk ki sahrā kaheñ jise

hai chashm-e-tar meñ hasrat-e-dīdār se nihāñ

shauq-e-’ināñ guseḳhta dariyā kaheñ jise

darkār hai shaguftan-e-gul-hā-e-’aish ko

sub.h-e-bahār pumba-e-mīnā kaheñ jise

'ġhālib' burā na maan jo vā'iz burā kahe

aisā bhī koī hai ki sab achchhā kaheñ jise

yā rab hameñ to ḳhvāb meñ bhī mat dikhā.iyo

ye mahshar-e-ḳhayāl ki duniyā kaheñ jise

hai intizār se sharar ābād rustaḳhez

mizgān-e-kohkan rag-e-kHārā kaheñ jise

kis fursat-e-visāl pe hai gul ko 'andalīb

zaḳhm-e-firāq kHanda-e-be-jā kaheñ jise

aaina kyun na dun ki tamasha kahen jise

aisa kahan se laun ki tujh sa kahen jise

hasrat ne la rakha teri bazm-e-KHayal mein

gul-dasta-e-nigah suwaida kahen jase

phunka hai kis ne gosh-e-mohabbat mein ai KHuda

afsun-e-intizar tamanna kahen jise

sar par hujum-e-dard-e-gharibi se Daliye

wo ek musht-e-KHak ki sahra kahen jise

hai chashm-e-tar mein hasrat-e-didar se nihan

shauq-e-’inan guseKHta dariya kahen jise

darkar hai shaguftan-e-gul-ha-e-’aish ko

subh-e-bahaar pumba-e-mina kahen jise

'ghaalib' bura na man jo wa'iz bura kahe

aisa bhi koi hai ki sab achchha kahen jise

ya rab hamein to KHwab mein bhi mat dikhaiyo

ye mahshar-e-KHayal ki duniya kahen jise

hai intizar se sharar aabaad rustaKHez

mizgan-e-kohkan rag-e-kHara kahen jise

kis fursat-e-visal pe hai gul ko 'andalib

zaKHm-e-firaq kHanda-e-be-ja kahen jise